Засгийн газар тариаланчдаас улаанбуудай худалдан авч нөөц бүрдүүлнэ. Тодруулбал, 2026 оны улсын төсөвт тодотгол хийж, санхүүжилтийн эх үүсвэрийг бий болгох аж. Энэ талаар  Хүнс, хөдөө аж ахуй, хөнгөн үйлдвэрийн сайд Ц.Идэрбат "Засгийн газраас өргөн барьсан төсвийн тодотгол дээр намрын тариа хураалтын ар дээр ямар бодлого баримтлах асуудлыг тусгасан. Улмаар стратегийн улаанбуудайн нөөцийг 100 мянган тоннд хүргэж худалдаж авна. Мөн хүнсний ногооны 12-13 мянган тонн нөөцийг улс тариаланч, ногоочдоосоо худалдаж авна. Энэ намрын тариа хураалтад шаардлагатай байгаа шатах, туслах материалын нөөцийг бүрдүүлэх хөрөнгийн эх үүсвэр болон гурилын үйлдвэрүүд дотоодын улаанбуудайг худалдаж авахад шаардлагатай хөнгөлөлттэй зээл олгоход мөн Засгийн газар анхаарна" гэв.