Үндэсний их баяр наадмын нээлт, хаалтын ёслолын тасалбар худалдаанд гарснаас хэдхэн минутын дараа бүрэн дуусч, цахим орчинд дамлан худалдаалах үзэгдэл гарч эхэллээ.

Тасалбар худалдаалагдаж дууссаны дараахан олон нийтийн сүлжээнд зарим хэрэглэгч наадмын шагийн тасалбарыг 400 мянган төгрөг хүртэлх үнээр худалдах зар нийтэлжээ.

Өнөөдөр өглөөний 07:00 цагаас тасалбарын борлуулалт эхлэхтэй зэрэгцэн иргэд цахим системд олноороо нэвтэрсэн ч “ихэнх суудал түгжигдсэн”, “аль хэдийн зарагдсан”, “суудлаа сонгосон ч төлбөр амжилтгүй болсон” зэрэг асуудалтай тулгарсан тухайгаа олон нийтийн сүлжээгээр мэдээлсээр байна.

Албаныхан долоодугаар сарын 11, 12-нд болох Үндэсний их баяр наадмын нээлт, хаалтын ёслолын тасалбарыг нэг бүрийг нь 150 мянган төгрөгөөр худалдаж, нэг иргэн хамгийн ихдээ хоёр тасалбар худалдан авах боломжтой гэж мэдээлсэн. Мөн системийн ачааллыг тэнцвэржүүлэх зорилгоор суудлын мэдээллийг 30-60 секунд тутам шинэчилж харуулна гэж тайлбарлаж байсан юм.

Гэвч хэрэглэгчдийн мэдээлж буйгаар тасалбарууд ердөө 4-6 минутын дотор бүрэн борлуулагдсан бөгөөд үүний дараа өндөр үнээр дамлан худалдаалах зарууд нийтлэгдэж эхэлсэн нь олон нийтийн шүүмжлэлийг дагуулж байна.