Монгол Улсын Зэвсэгт хүчин, Энэтхэг-Номхон далай дахь Америкийн Нэгдсэн Улсын командлалын Агаарын цэргийн хүчний хамтарсан “Энхийн элч-2023” олон улсын эмнэлэг, барилга-инженерийн хүмүүнлэгийн сургуулийн хаалтын ажиллагаа өнөөдөр боллоо. Энэхүү ажиллагаанд Монгол Улсын Засгийн газрын гишүүн, Батлан хамгаалахын сайд Г.Сайханбаяр оролцож, хүмүүнлэгийн ажил өрнүүлсэн бүрэлдэхүүнд талархал илэрхийлж, амжилт хүслээ. 

“Энхийн элч-2023” эмнэлэг, барилга-инженерийн  сургуулийн хүрээнд  Батцэнгэл, Их тамир сумын иргэдэд Монгол, АНУ, Непал, Тайланд улсын эмч, эмнэлгийн ажилтнууд нүд, шүд, дотор, зүрх судас, хүүхэд, сэргээн засах чиглэлээр эрүүл мэндийн үзлэгийг үнэ төлбөргүй үзүүлсэн бол  Жаргалант, Цэнхэр сумдын ЗДТГ, ЕБС, ЭМТ, ахмадын төвд шаардлагатай засвар, сантехникийн болон цахилгааны засварыг Монгол, АНУ, Австрали улсын инженерүүд хамтран хийж гүйцэтгэв.

Барилга-Инженерийн засварын ажлын хүрээнд Монгол, АНУ, Австрали Улсын инженерүүд хамтран Жаргалант сумын ЗДТГ-ын байр, ахмадын төв, бага сургуулийн сагсан бөмбөгийн талбайн засвар, сургуулийн дээврийн засвар, Цэнхэр сумын Хүн эмнэлгийн хаалга, цонх, шал сантехникийн болон цахилгааны засварын ажлыг хийсэн ба гадаадын 61, Монгол Улсаас 40 цэргийн алба хаагч оролцов.