Улсын ерөнхий прокурорын газрын 2023 оны тавдугаар сарын 29-ний өдрийн тогтоолоор “Боловсрол, шинжлэх ухааны яамны харьяа Боловсролын зээлийн сангаас төрийн өндөр албан тушаалтнуудын хамаарал бүхий этгээдүүд хууль бусаар тэтгэлэг авч, эргэн төлөөгүй” гэх гэмт хэргийн талаарх мэдээллийг шалгах ажлын хэсэг байгуулсан. 

Ажлын хэсгээс хэрэг бүртгэлтийн 11, мөрдөн байцаалтын хоёр хэрэгт мөрдөн шалгах ажиллагаа явуулж, хэрэг бүртгэлтийн нэг хэргийг хааж, нэг хэргийг нэгтгэж, мөрдөн байцаалтын нэг хэрэгт яллах дүгнэлт үйлдэж, шүүхээр шийдвэрлүүлсэн байна. 

Одоо Цагдаагийн ерөнхий газрын Эрүүгийн цагдаагийн албанд хэрэг бүртгэлтийн нэг, Авлигатай тэмцэх газрын Мөрдөн шалгах хэлтэст найман хэрэг ажиллагаанд шалгагдаж байгаа бөгөөд яллах дүгнэлт үйлдүүлэх саналтай ирүүлсэн нэг хэрэг прокурорын хяналтын шатанд хянагдаж байгааг аж. 

Тус сангийн үйл ажиллагаанд холбогдуулан мөрдөн шалгах ажиллагаа явуулж эхэлснээс хойш хугацаанд нийт 694 суралцагчаас 3,054,210 ам.доллар (одоогийн ханшаар 10,2 тэрбум төгрөг)-ын гадаад зээлийн эргэн төлөлт хийгдсэн болохын прокурорын байгууллагаа мэдээллээ.