Chig.mn сайт Доод мөчдийн саажилттай 12 настай T.Тэнүүн хүүгийн амьдралыг сурвалжлан хүргэсэн.

Т.Тэнүүн хүүгийн гэр бүл олон жилийн эрэл хайгуулын эцэст хүүгээ бүрэн эмчлэгдэх боломжтой гэсэн баяртай мэдээг хүлээн авч, эмчилгээний зардлаа бүрдүүлхийн тулд ард иргэдээс дэмжлэг хүсээд буй юм.

Т.Тэнүүн хүүгийн аав, ээж хүүгээ төрсөн цагаас нь эхлэн өөрсдийн болон ойр дотныхоо хүмүүсийн дэмжлэгээр гадаад, дотоодын олон эмнэлгээр явж, тууштай тэмцэж ирсэн. Тэгвэл тэд олон сар, жилийн судалгааны эцэст БНХАУ-ын Шаньдун муж, Чиндао хотын Тархины эмгэгийн нөхөн сэргээх, хөдөлгөөн заслын "Runhot" хүүхдийн эмнэлгийг олж, харилцаа тогтоосон билээ. Тус эмнэлгээс хүүг бүрэн эдгэрэх боломжтой гэсэн хариу өгсөн бөгөөд урт хугацааны эмчилгээний үр дүнд бодитоор хөл дээрээ боссон олон хүүхдийн түүх тэдэнд асар их итгэл найдвар бэлэглэжээ.

Т.Тэнүүн хүүгийн гэр бүл зөвхөн хүүгийнхээ эмчилгээний төлбөрийг олоод зогсохгүй, Монгол дахь хөгжлийн бэрхшээлтэй хүүхдүүдийн түүчээ болж, тэдэнд тулгардаг хүртээмж, эмчилгээ, үйлчилгээний бодит үнэн нөхцөл байдлыг нийгэмд таниулах, холбогдох шийдвэр гаргагчдад дуу хоолойгоо хүргэх том зорилго тавин ажиллаж байгаа юм.

Хүүгийнхээ мөрөөдлийг биелүүлэхээр тэмцэж буй эцэг эхийн сэтгэлийг дэмжиж, өнөөдрийн байдлаар уран бүтээлчид, хэвлэл мэдээллийн байгууллагууд болон 1.5 сая гаруй Монголчууд тэдний бэлтгэсэн контентыг үзэж, сэтгэлийн дэм хайрлаад байна. Одоогийн байдлаар шаардлагатай байгаа нийт 300 сая төгрөгийн эмчилгээний зардлаас 21 сая төгрөг цуглараад байгаа аж.

Т.Тэнүүн хүүгийн аав ээж "Бидний хүүгийн хүсэл мөрөөдөл, зорилгыг биелүүлэхийн тулд чин сэтгэлийн тусламж, дэмжлэг, хайр халамжийг түгээж буй нийт Монгол түмэндээ чин сэтгэлээсээ талархаж байна. Өнөөдөр ч, маргааш ч, ирээдүйд ч сэтгэлийн дэмжлэг, бүх хайраа лайк, шэйр, дэмжлэг хийж, түгээж буй та бүхний хичээл зүтгэлээр эмчилгээний зардал бүрэн цуглана гэдэгт итгэж байна” хэмээн талархлын сэтгэгдлээ илэрхийллээ.

Эрүүл саруул болж, ирээдүйд ихийг бүтээх урам зориг дүүрэн Т.Тэнүүн хүүд туслахыг хүссэн хүн бүр энэхүү мэдээллийг цааш түгээн, сэтгэлийн хандив өргөх боломжтой юм.

Хандив хүлээн авах: Хаан банк: 5250287116 IBAN: 58000500 Хүлээн авагч: Бат-Өлзий Номин (T.Тэнүүний ээж) Утас: 86200925