АШУҮИС-ийн Монгол-Японы эмнэлэгт УИХ-ын гишүүн, БШУ-ны сайд Л.Энх-Амгалангийн дэмжлэгтэйгээр боловсролын сургалтын байгууллагын багш, ажилтанд төрөлжсөн мэргэшлийн эрүүл мэндийн тусламж үйлчилгээ үзүүлэх, нийгмийн эрүүл мэндийн болон эмнэлзүйн зөвлөгөө, мэдээлэл өгөх чиг үүрэг бүхий “Багшийн эрүүл мэндийг дэмжих төв” үүсэн байгуулагдсан бөгөөд багш, ажилтнууд байгууллагын эмч, эмнэлгийн мэргэжилтнээр дамжуулан цахимаар хүсэлт илгээж уг төвөөр үйлчлүүлэх боломжтой болох юм.

Багшийн эрүүл мэндийг дэмжих төв байгуулагдсанаар багш, ажилтнууд төрөлжсөн мэргэшлийн эмнэлгээр үйлчлүүлэх хүлээгдэл буурах, цаг хэмнэх, оношилгоо эмчилгээг цаг алдалгүй хийх, багш, ажилчдын дунд эрүүл дадал, зан үйлийг хэвшүүлэх зэрэг давуу талтайгаас гадна улсын хэмжээн дэх багш, ажилтны эрүүл мэндийн цахим сантай болох юм. 

Багшийн эрүүл мэндийг дэмжих төвийн үйл ажиллагааны үндсэн чиглэл болон цахим платформыг таниулах зорилгоор “Боловсролын сургалтын байгууллагын эмч, эмнэлгийн мэргэжилтнүүдийг мэдээлэл арга зүйгээр хангах” сэдэвт сургалтыг 2023 оны 8 дугаар сарын 22-ны өдөр Баянзүрх дүүргийн нийт цэцэрлэг, сургуулийн эмч нарын дунд амжилттайгаар зохион байгууллаа.