Ховд болон Баян-Өлгий аймагт малын гоц халдварт шүлхий өвчин гарсан.Тодруулбал, “Монголд өмнө нь бүртгэгдэж байгаагүй шүлхийн “Сат 1” хэвшил тархсан байж болзошгүй. Одоогоор олон улсад шинжлүүлэхээр дээж явуулсан. Хариу энэ 7 хоногтоо багтаж ирнэ” хэмээн Мал эмнэлгийн ерөнхий газраас мэдээллээ.

Дээрх мэдээлэлтэй холбоотойгоор өнөөдөр /2026.06.03/ Ховд аймгийн Онцгой комисс хуралдаж, дараах шийдвэрийг гаргажээ. 

Гишүүдийн 95 хувийн ирцтэй хуралдсан тус хурлаар:Булган, Үенч суманд гарсан малын гоц халдварт шүлхий өвчний нөхцөл байдал, авч хэрэгжүүлж буй арга хэмжээ цаашид анхаарах асуудлын талаар ярилцаж шийдвэр гаргалаа.

Тухайлбал,

-Баруун гурван суманд /Булган, Үенч, Алтай/ сум, багийн түвшинд хүн малын болон тээврийн хэрэгслийн хөдөлгөөнийг 14 хоногийн хугацаанд хязгаарлах,

-Ариутгал халдваргүйтгэлийн ажлыг эрчимжүүлж ачаа тээврийг хэвийн явуулах, аймаг сумын шаардлагатай цэгүүдэд пост гаргах,

-Үүссэн нөхцөл байдалтай холбоотой асуудлыг шийдвэрлэх, мэргэжил арга зүйгээр хангах, халдварыг хумих зэрэг чиглэлээр ажиллах "Шуурхай штаб"-ыг аймгийн Онцгой комиссын дэргэд байгуулж ажиллахаар боллоо.

Өнөөдрийн /2026.06.03/ байдлаар Булган, Үенч суманд шүлхий өвчний халдварын нийт зургаан голомтод 200-аад мал өвчилсөн мэдээтэй байна.