Бурхан багшийн манлай хоёр их шавь Шаарийбуу, Монголжийбуу нарын их эрдэнийн шүтээн ринсрэл өнөөдөр Монгол улсад тусгай үүргийн онгоцоор ирнэ. Их шүтээнийг Чингис хаан ОУНБ-аас тосч авч хүндэтгэлийн цуваагаар Гандантэгчэнлин хийдэд авч ирнэ. Улмаар Батцагаан дуганы өмнөх талбайд Энэтхэгийн талаас Ринсрэлүүдийг Тэргүүн хамба лам болон Боловсролын сайдад гардуулан өгч, ринсрэлүүдийг задалж тусгайлан зассан хүндэтгэлийн хоргонд зална. Дараа нь лам нар мандал өргөж, ерөөл, залбирал уншина. Мөн ринсрэл заларсанд хүндэтгэл үзүүлэх зоог барина. 

Ринсрэл гэдэг нь Буддын шашинт лам багш нарын чандарын үнснээс гардаг бөгөөд энэрэнгүй сэтгэл хийгээд билиг ухааны эрдмийг олсноор үүсэн буй болдог гэж үздэг.  Ринсрэл харснаар асрал энэрлийн сэтгэл төрдөг учиртай. 1850 оны үед архелогичид суварганаас бурхан багшийн хоёр шавийн нэр нь бичээстэй ринсрэлийг олсон түүхтэй. Энэ нь Энэтхэгийн Мадхья Прадеш муж, Санчи хотын ойролцоо НТӨ III зуунд Ашока хааны үед баригдсан Буддын шашны хамгийн эртний, хамгийн том суваргуудын нэг ажээ.