Бурхан багшийн их дүйчэн өдөр зуны тэргүүн сарын шинийн 15-нд тохиодог. Энэ жилийн тухайд аргын тооллоор тавдугаар сарын 31-ний ням гарагт тохиож байна. Бүх нийтээр амран тэмдэглэдэг энэ билэгт сайн өдрийг угтан бурхны шашныг түгээн дэлгэрүүлэх, зан үйлийг таниулах, өвлүүлэн уламжлуулах, бүх нийтээр буян үйлдэж даган баясах олон талт үйл ажиллагаа, арга хэмжээнүүд уламжлал болон тогтоод байгаа билээ. Эл өдрийг угтаж тохиолдуулан бурхан багшийн 12 их зохионгуйг хүргэж байна. 

1. Түшита тэнгэрийн орноос буухыг шийдсэн

Амьтан бүхнийг зовлонгоос ангижруулахын тулд Түшита тэнгэрийн орноос хүмүүний ертөнцөд мэндлэхээр шийдвэрлэв.

2. Эхийн хэвлийд заларсан

Майя хатны хэвлийд цагаан зааны дүрээр заларсан хэмээн сударт өгүүлдэг.

3. Лүмбинид мэндэлсэн

Лүмбинийн цэцэрлэгт ханхүү Сиддхартха болон мэндэлж, ертөнцөд их үйлсээ бүтээх эхлэлээ тавив.

4. Эрдэм ухаанд төгс суралцсан

Бичиг үсэг, урлаг, цэрэг эрийн эрдэм зэрэг тухайн үеийн бүх боловсролыг төгс эзэмшжээ.

5. Хатан авч өргөө байгуулсан

Яшодхара хатантай гэрлэн ханхүүгийн амьдралыг туулж, Рахула хэмээх хүүтэй болов.

6. Ордноос нууцаар мордсон

Өвчин, өтлөлт, үхэл, даяанч дөрвөн үзэгдлийг харж, амьдралын үнэн учрыг эрэн хайхаар ордноо орхин оджээ.

7. Зургаан жил даяан хийсэн

Урувилвагийн ойд зургаан жилийн турш хатуу даяан бясалгал үйлдсэн боловч энэ нь төгс гэгээрэлд хүргэх зам биш болохыг ойлгов.

8. Бодь модны дор заларсан

Бодь модны дор суун, үнэн мэдлэгийг олох хүртлээ босохгүй хэмээн тангараглаж бясалгалд оржээ.

9. Марыг номхотгосон

Мара болон түүний цэргүүдийн саад тотгорыг даван туулж, нисванисыг бүрэн дарсан юм.

10. Төгс гэгээрэлд хүрсэн

35 насандаа Бодьгаяад төгс гэгээрэлд хүрч, Будда буюу “Гэгээрсэн нэгэн” болов.

11. Номын хүрдийг анх эргүүлсэн

Сарнатын Бугад паркт анхны сургаалиа айлдаж, Дөрвөн үнэн, Найман мөрт замыг номлов.

12. Их нирваанд орсон

80 насандаа Кушинагарт их нирваан дүр үзүүлж, бүтсэн бүхэн мөнх бус болохыг айлдан шавь нараа сургажээ.