Фэйсбүүк, Инстаграм зэрэг цахим орчинд хэн нэгнийг “зүгээр л тоглоод” эсвэл “уур хүрсэн үедээ” доромжлох, зураг, бичлэгийг нь зөвшөөрөлгүй нийтлэх нь хуулийн хариуцлага хүлээлгэх үндэслэл болдог. Ийм эрсдэлээс сэргийлэхийн тулд дараах хуулийн зохицуулалтыг анхаараарай.

Зөвшөөрөлгүй зураг, бичлэг нийтлэх нь ХУУЛЬ БУС 

• Иргэний хуулийн 21.5-д зааснаар иргэний дүрсийг гэрэл зураг, дүрс бичлэг болон бусад хэлбэрээр өөрийнх нь зөвшөөрөлгүйгээр нийтэлсэн, олон нийтэд үзүүлснээс гэм хор учирсан бол хохирлоо арилгуулахаар шаардах эрхтэй.

• Зөрчлийн тухай хуулийн 6.22-т зааснаар оршин суугчийн зөвшөөрөлгүйгээр орон байранд, эсхүл гадна талаас орон байрны доторх орчны зураг, бичлэг хийсэн бол 200,000 төгрөгөөр торгоно.

• Эрүүгийн хуулийн 13.8-д зааснаар хувь хүний халдашгүй байх эрхэд халдаж, зөвшөөрөлгүй авсан зураг, бичлэгийг олон нийтэд тараасан бол зорчих эрхийг хязгаарлах эсвэл хорих ял шийтгэх хүртэл хариуцлага хүлээлгэнэ.

 Хүний нэр төр, алдар хүндийг гутаах нь ТӨЛБӨРТЭЙ 

• Иргэний хуулийн 21.2-т зааснаар хүний нэр төр, алдар хүндийг гутаасан мэдээлэл тараасан этгээд тухайн мэдээллээ үнэн болохыг нотолж чадахгүй бол уг мэдээллийг няцаах үүрэгтэй.

• Нэр төрөө гутаалгасан иргэн эдийн бус гэм хорыг буюу сэтгэл санааны хохирлоо мөнгөн хэлбэрээр нөхөн төлүүлэхээр шүүхэд хандах эрхтэй.

Хүүхдийн зураг, бичлэгийг зөвшөөрөлгүй нийтлэх нь ХОРИОТОЙ

• Зөрчлийн тухай хуулийн 6.20.3.2-т зааснаар хүүхдийн өөрийнх нь, эсхүл эцэг эх, асран хамгаалагчийн зөвшөөрөлгүйгээр зураг, бичлэгийг нь мэдээлэл, сурталчилгаанд ашиглахыг хориглодог.

Зөрчил гаргасан тохиолдолд хуульд заасан хариуцлага хүлээлгэнэ.

Энэхүү мэдээлэл нь нийтэд зориулсан ерөнхий эрх зүйн мэдээлэл болно. Тухайн асуудлын нөхцөл байдлаас хамааран хууль хэрэглээ өөр байх боломжтой тул мэргэжлийн хуульч, өмгөөлөгчөөс эрх зүйн зөвлөгөө авна уу.