НИТХ-ын төлөөлөгч Б.Сэргэлэнбаатар, "Үнэн ба зөв" намын ЕНБД асан Ш.Мөнхсайхан нарыг АТГ-аас 48 цагийн хугацаатай саатуулаад суллалаа. Тодруулбал, АТГ “Сэлбэ дэд төвийн орон сууцны иж бүрэн цогцолбор хороолол (71 айлын 9 давхар барилга, 6 блок 71 айлын 12 давхар, 8 блок) багц 4.2 төсөл арга хэмжээ”-г сонгон шалгаруулахдаа хууль зөрчсөн байж болзошгүй гэх гэмт мэдээллийг хүлээн авч хэрэг бүртгэл нээн шалгаж байна.

Уг тендерт шалгарсан “Професионалстрой” ХХК-ийн 30 хувийн хувьцаа эзэмшигч Б.Сэргэлэнбаатар, 70 хувийн хувьцаа эзэмшигч Ш.Мөнхсайхан нар бөгөөд АТГ бүрэн эрхийн хүрээнд 48 цаг баривчлаад сулласан юм. 

Тэгвэл тухайн компанитай холбоотой өөр нэг тендерийн асуудал олны анхаарлыг татаж байна. Тодруулбал, Б.Сэргэлэнбаатар, Ш.Мөнхсайхан нарын “Професионалстрой” ХХК нь ЧД-ийн 9-р хороо олонд нэршсэнээр Цагаан байрны дахин төлөвлөлтийн тендерийг мөн 2019 онд авчээ. Ингээд “Өсөх дэнж” хотхон барина хэмээн 33 айлын газар чөлөөлүүлж 1.8 жилийн дараа байранд нь оруулна хэмээж. Гэвч өнөөдөр энэ төсөл худлаа болж айлууд 7 дахь жилдээ энэ тэнд толгой хоргодож явна.  

“Өсөх дэнж” хотхон төсөл 2019 онд гэрээ хийж, 2020 онд газар чөлөөлсөн. За ингээд дараа улирал, дараа жил гэсээр долоон жилийн нүүрийг үзэж байна. Газраа чөлөөлсөн айлуудаас ихэнх нь түрээсийн мөнгө гэж авч чадаагүй, хэдхэн айл л 500 мянгөн төгрөг авахаар гэрээлж, бусад нь үнсэнд хаягдсан шалз болцгоожээ. 

Хамгийн хачирхалтай нь ийм хар түүхтэй компани өнөөдөр “Сэлбэ дэд төвийн орон сууцны иж бүрэн цогцолбор хороолол (71 айлын 9 давхар барилга, 6 блок 71 айлын 12 давхар, 8 блок) багц тендерийг авч чаджээ. Тэгээд ч болоогүй нөгөө хөсөр хаячихсан Цагаан байрны айлуудтай өнөөдөр НОСК-иас хүмүүс очиж уулзжээ. Ухаан нь, дарга нар нь шалгагдаад эхлэхээрээ гэмээ ухаарч, тэдэнтэй очоод тохироод ир гэсэн бололтой. Гэвч Нийслэлийн орон сууц бодлогын газрын мэргэжилтэн Пүрэвсүрэн, Дашдаваа нар, газар чөлөөлсөн иргэдийн төлөөлөл ирсэн ч гүйцэтгэгч компанийн эрх бүхий албан тушаалтан ирээгүй учир 15 хоногийн гурван талт уулзалт зохион байгуулахаар болжээ.