Хэнтий аймагт ₮19 тэрбумын өртөгтэй Хүүхэд, залуучуудын спорт, сургалт, хөгжлийн төв барихаар болжээ.

2026 онд улсын төсвийн хөрөнгө оруулалтаар хэрэгжих томоохон ажлуудын нэг нь энэ бөгөөд тус төслийн тендерийг аль хэдийн зарласан байна.

Төслийн захиалагчаар Соёл, спорт, аялал жуулчлал, залуучуудын яам болон Төрийн худалдан авах ажиллагааны газар ажиллаж байгаа аж. Гүйцэтгэгч компани нь ажлыг 2027 оны 12 дугаар сарын 1-ний дотор бүрэн дуусгах бөгөөд үүний тулд үе шаттай хэрэгжилтийн төлөвлөгөө ирүүлэх шаардлагатай гэнэ.

Энэхүү төв ашиглалтад орсноор орон нутгийн хүүхэд, залуучуудын спорт, хөгжлийн орчин сайжрах ч төсвийн үр ашиг, зарцуулалт хэр оновчтой байх вэ гэдэг нь анхаарал татаж байна.