Цаг уурын байгууллагаас ойрын өдрүүдэд ихэнх нутгийг хамарсан цаг агаарын аюултай, зарим бүсэд гамшигт үзэгдэл ажиглагдахыг анхаарууллаа. Тодруулбал, дөрөвдүгээр сарын 18-наас 19-нд шилжих шөнө болон 19-ний өдөр хүчтэй салхи, цасан болон шороон шуурга шуурч, огцом хүйтрэх төлөвтэй байна.

Хэнтийн нутгаар 18-19-нд шилжих шөнө хүчтэй цасан шуурга шуурах бол Дундговь, Дорноговийн нутгаар салхины хурд секундэд 28-34 метр хүрч ширүүсэх, шороон шуурга дэгдэх төлөвтэй байна. Мөн Өвөрхангай, Өмнөговь, Говьсүмбэр, Сүхбаатар зэрэг аймгуудын нутгаар салхи 18-24 метр хүрч ширүүсэхийг анхааруулжээ.

Дөрөвдүгээр сарын 19-ний өдөр зүүн аймгуудын нутгаар нөхцөл байдал үргэлжилж, Хэнтий, Сүхбаатар, Дорнодын зарим хэсгээр хүчтэй салхи, цасан болон шороон шуурга шуурна. Ялангуяа нутгийн зүүн хагаст 10-20 градусаар огцом хүйтэрч, халтиргаа гулгаа, мөстөлт үүсэх, зам даваа хаагдах, үзэгдэх орчин хязгаарлагдах эрсдэлтэй байна.

Улаанбаатар хот орчимд шөнөдөө цас орж, цасан шуурга шуурах бөгөөд салхи секундэд 16-18 метр хүрч ширүүснэ. Температур өмнөх өдрөөс 10-15 градусаар буурч, шөнөдөө -10...-12 градус, өдөртөө 0...-2 градус хүйтэн байх төлөвтэй байна.

Цаашид дөрөвдүгээр сарын 20-ноос ихэнх нутгаар цаг агаар тогтворжиж, дулаарах хандлагатай боловч зүүн аймгуудын зарим хэсгээр цас, шуурга үргэлжлэхийг анхааруулжээ. Салхи 20, 21-нд Дорнод Монголын тал нутгаар мөн ширүүсэх төлөвтэй байна.

Иймд малчид, иргэд, тээвэрчид та бүхэн цаг агаарын сэрэмжлүүлэг мэдээг тогтмол авч, хол замд гарахгүй байх, болзошгүй эрсдэлээс урьдчилан сэргийлэхийг онцгойлон анхааруулж байна.