Шүүх нэхэмжлэгч Ө хариуцагч Б-д холбогдуулан “Үл хөдлөх хөрөнгийг хууль бусаар эзэмшиж, ашиглаж байгаа” гэх үндэслэлээр үл хөдлөх хөрөнгөөс албадан чөлөөлүүлэх тухай нэхэмжлэл гаргасан. Нэхэмжлэгч Ө нь Баянзүрх дүүрэгт оршин суудаг, хариуцагч Б нь Хан-Уул дүүрэгт оршин суудаг боловч тухайн маргаан бүхий үл хөдлөх хөрөнгө нь Налайх дүүргийн нутаг дэвсгэрт байрладаг байна. 

“Үл хөдлөх эд хөрөнгөтэй холбоотой буюу эд хөрөнгийн битүүмжлэлийг нээлгэх тухай нэхэмжлэлийг тухайн эд хөрөнгө байгаа газрын шүүхэд гаргана” гэж Иргэний хэрэг шүүхэд хянан шийдвэрлэх тухай хуулийн 16 дугаар зүйлийн 16.1.-д заасан.

Газар, түүнээс салгамагц зориулалтын дагуу ашиглаж үл болох эд юмс үл хөдлөх эд хөрөнгийн шинжийг агуулсан хөрөнгөтэй холбоотойгоор тухайн шүүх харъяалан шийдвэрлэхийг шүүхийн онцгой харъяалал гэж үздэг. Өөрөөр хэлбэл үл хөдлөх хөрөнгийнх нь эрхтэй (эзэмших, ашиглах, захиран зарцуулах) шууд холбоотой байхыг ойлгоно. Нэхэмжлэгчийн нэхэмжлэлийн шаардлага нь үл хөдлөх хөрөнгийг эзэмших, ашиглахтай холбоотой болох нь тогтоогдсон, түүнээс уг үл хөдлөх хөрөнгийн үүргийн эрх зүйн шаардах эрхэд хамаарахгүй байна. Иймд шүүх нэхэмжлэлийг хүлээн авч Иргэний хэрэг шүүхэд хянан шийдвэрлэх тухай хуулийн 13, 16 дугаар зүйлд заасан хэргийн болон шүүхийн харьяаллыг зөрчөөгүй тул иргэний хэрэг үүсгэж шийдвэрлэв.