Нийслэлийн Сүхбаатар дүүрэгт улсын цэцэрлэгийн зориулалттай газрыг дахин төлөвлөх нэрээр хувийн орон сууцны барилга барьсан ноцтой хэргийг Цагдаагийн байгууллагаас илрүүлэн, мөрдөн шалгах ажиллагааг эхлүүлжээ. Тодруулбал, Сүхбаатар дүүрэгт байрлах ашиглалтын шаардлага хангахгүй цэцэрлэгийн барилгыг буулгаж, суурин дээр нь шинээр цэцэрлэг барих төсөлд нэр бүхий аж ахуйн нэгж шалгарч 125 хүүхдийн багтаамжтай орчин үеийн цэцэрлэг барихаар холбогдох зөвшөөрлийг авсан байна.

Гэвч улсын комисс хүлээж авах шатанд анхны зураг төсөл бүрэн өөрчлөгдөж, цэцэрлэгийн бус 16 давхар үйлчилгээтэй орон сууцны барилга боссон нь хяналт шалгалтаар тогтоогджээ.

Түүнчлэн, эрх бүхий албан тушаалтнуудад нөлөөлж барилгын зураг төслийг хууль бусаар өөрчлүүлсэн аж. Тухайн компани нь цэцэрлэгийг барилгын 1, 2 дугаар давхарт байршуулна гэх аман тохиролцоог эрх бүхий байгууллагатай хийж, шийдвэр гаргуулсан гэх боловч ажлын байранд хийсэн нэгжлэгээр хураан авсан баримтуудад энэ талаар тусгагдаагүй болох нь батлагдсан байна.

Уг хэрэгт Эрүүгийн хуулийн тусгай ангийн 17.4 буюу хөрөнгө завших болон 18.6 мөнгө угаах гэх зүйл заалтуудаар хэрэг бүртгэлт, мөрдөн байцаалтын ажиллагааг үргэлжлүүлж байна.