Хоёр хоногийн хугацаанд орон нутгийн замд гарсан хоёр тусдаа зам тээврийн ослын улмаас нийт долоон хүн амь насаа алдлаа.

Тодруулбал, 2026 оны дөрөвдүгээр сарын 2-ны өглөө 08:00 цагийн орчимд Дорноговь аймгийн “Цагаан хаалга”-наас хойш 10 км-т хоёр автомашин мөргөлдсөн тухай дуудлага цагдаагийн байгууллагад ирсэн байна. Шалгалтаар ачааны болон суудлын автомашин мөргөлдсөний улмаас дөрвөн хүн нас барсан ноцтой осол гарсан нь тогтоогдож, уг хэргийг Дорноговь аймгийн цагдаагийн газар шалгаж байна.

Мөн дөрөвдүгээр сарын 3-ны өдөр 11:00 цагийн орчимд Дундговь аймгийн “Хөтлийн шар” гэх газарт гарчээ. Тус ослоор Toyota Land Cruiser 200 маркийн автомашин замын хажуу руу онхолдож, гурван хүн амь насаа алдсан байна. Ослын шалтгаан нөхцлийг Дундговь аймгийн цагдаагийн газар тодруулахаар ажиллаж байгаа аж.

Иймд орон нутгийн замд зорчих жолооч нар замын нөхцөл байдалд хурдаа тохируулах, хамгаалах бүсээ тогтмол хэрэглэх, анхаарал болгоомжтой хөдөлгөөнд оролцохыг цагдаагийн байгууллагаас анхааруулж байна.