Энэ сарын 29-нд Сүхбаатар аймгийн Баруун-Урт суманд зохион байгуулсан “Монгол ноолуур-2026” дуудлага худалдаанд зүүн бүсийн гурван аймгийн малчид, хоршоодоос бэлтгэсэн нийт 14 тонн ноолуурыг үндэсний үйлдвэрүүд үнэ хаялцан худалдан авчээ. Энэ үеэр ноолуурын хамгийн өндөр ханш кг тутамд 198 мянган төгрөгт хүрсэн байна.

Худалдан авагч тал ноолуурыг урьдчилан ангилан, чанарын шалгалт хийсний дараа сум бүрээр нь тусад нь дуудлага худалдаанд оруулсан бөгөөд Сүхбаатар сумын малчдын бэлтгэсэн 1.2 тонн ноолуурыг “Гоёл кашмер” ХХК хамгийн өндөр үнээр худалдан авсан байна. Харин бусад сумдын ноолуурын ханш 193-195 мянган төгрөгийн хооронд хэлбэлзжээ.

Дуудлага худалдааны дараа малчид, хоршоод ХАА-н бирж болон худалдан авагч компаниудтай гэрээ байгуулж, ноолуурын төлбөрийг дансаар шилжүүлэх нөхцөлөөр арилжаа өндөрлөсөн байна. Одоогийн байдлаар ноолуурын ханш бүс нутгуудад 195-200 мянган төгрөгийн хооронд хэлбэлзэж байгаа бөгөөд чанар, цэвэр самналтаас хамааран цаашид өсөх боломжтой хэвээр байгааг эх сурвалжууд онцоллоо.