Б.Мөнх-Эрдэнэ нь нийтийн албан тушаалтнаар ажиллаж байх хугацаандаа бүрэн эрх албан тушаалын байдлаа албаны эрх ашгийн эсрэг урвуулан ашиглаж сумын Засаг даргын тушаалаар байгуулагдсан ажлын хэсгийн гишүүн Д.Адилбиш, Ч.Төгсжаргал, Л.Сэлэнгэсайхан нарын техникийн тодорхойлолтод заасан шаардлага хангаагүй буюу мотор нь тос гоожсон 200 мянган км- ээс дээшгүй гүйлттэй байх ёстой байхад 272 мянган км-ийн гүйлттэй бичиг баримтгүй гэх үндэслэлээр хүлээн авахаас татгалзаж буцаасан автомашиныг хүлээж авах талаар хууль бус үүрэг өгч, техникийн тодорхойлолтод заасан шаардлага бүрэн хангаагүй автомашиныг хүлээн авч санхүүжилтийг бүрэн олгох нөхцөлийг бүрдүүлж З ХК-д хууль бус давуу байдал бий болгосон хэрэгт. Л.Сэлэнгэсайхан нь техникийн тодорхойлолтод заасан шаардлага бүрэн хангаагүй автомашиныг хүлээн авч санхүүжилтийг бүрэн олгох нөхцөлийг бүрдүүлсэн харин Д.Адилбиш Ч.Төгсжаргал нар нь тус хэргийг үйлдэхэд дэмжлэг үзүүлж хамжигчаар хамтран оролцсон хэрэгт холбогдож прокуророос яллах дүгнэлт үйлдэн хэргийг шүүхэд шилжүүлжээ.

Анхан шатны шүүх хэргийг хэлэлцээд Эрүүгийн хуулийн тусгай ангийн 22 дугаар бүлэгт заасан авлигалын гэмт хэрэг нь сонгуульт болон томилогдсон албан тушаалтан хууль тогтоомжоор олгосон бүрэн эрх, хүлээлгэсэн чиг үүргийг албаны эсрэг хувийн ашиг сонирхлоо гүйцэтгэх зорилгод ашигласан байдаг онцлогтой буюу албаны эрх ашгаа урвуулах, хэтрүүлэх замаар хувьдаа ашиг хонжоо олох эсхүл өөр хүн, хуулийн этгээдэд боломж олгосноор дээрх бүлэгт заасан хэргийн нийтлэг шинж болдог. Тус гэмт хэрэг нь хувьдаа болон бусдад эдийн болон эдийн бус ашигтай байдлыг бий болгох зорилгоор шунахайн сэдэлтэйгээр шууд санаатай үйлдэгддэг ба эдгээр нь бүхэлдээ үгүйсгэгдсэн тохиолдолд гэмт хэргийн шинжгүй гэж үздэг. Шүүгдэгч нар нь техникийн шаардлага хангаагүй тээврийн хэрэгслийг хүлээж авсан үйл баримт тогтоогдож байгаа боловч ямар нэгэн ашгийг хичээж албан тушаалын байдлаа урвуулан ашиглаж албаны эрх ашгийн эсрэг бусдад давуу байдал бий болгох санаа зорилготой байсан гэдэг нь тогтоогдоогүй, мөн хөрөнгийн үнэлгээгээр маргаан бүхий тээврийн хэрэгсэл нь 43,4 сая төгрөгөөр үнэлэгдсэн гэх агуулгатай дүгнэлтийг хийж Эрүүгийн хэрэг шүүхэд хянан шийдвэрлэх тухай хуулийн 34.19 дүгээр зүйлийн 1 дэх хэсгийн 1.1-д зааснаар шүүгдэгч Б.Мөнх-Эрдэнэ, Д.Адилбиш, Ч.Төгсжаргал, Л.Сэлэнгэсайхан нарт холбогдох хэргийг гэмт хэргийн шинжгүй үндэслэлээр хэрэгсэхгүй болгож, цагаатгаж шийдвэрлэлээ.