Т.Мөнхтуул нь нийтийн албан тушаалтнаар ажиллаж байхдаа Ойгоос мод бэлтгэх журамд заасан ... байгалийн гэнэтийн гамшиг, түймэр, ойн хөнөөлт шавж, салхи шуурга, цас үер гэх мэтийн улмаас мод нэлэнхийдээ хатсан хугарч гэмтсэн унасан талбайд цэвэрлэгээ хийхэд ойн ангийн дүгнэлтийг үндэслэн сумын Засаг дарга шийдвэр гаргана, мөн Ойд арчилгаа цэвэрлэгээ хийх журамд заасан арга хэмжээг төлөвлөх тохиолдолд сумын болон сум дундын ойн анги дүгнэлт гаргана, ойд хийгдэх цэвэрлэгээг хэлбэр тус бүрээр нь төлөвлөнө.

Үүнд ойн түймэр, хөнөөлт шавж болон өвчин, хүчтэй салхи цасны нөлөөгөөр унасан мод, гишүү, мод бэлтгэлийн үлдэгдлийг ойгоос гарах ... цаашид ургах чадваргүй болсон ой модыг огтлох замаар ойг цэвэрлэж эрүүлжүүлэхэд чиглэсэн цэвэрлэгээ гэж тус тус заасныг зөрчиж албан үүрэг бүрэн эрх албан тушаалын байдлаа урвуулан ашиглаж 23 га талбайд ойн дүгнэлт гаргалгүй талбайд тусгаарлалт хийж 2023 оны 12 сард Х ХХК-ийн захирал Ж.Б-тэй мод бэлтгэх гэрээг байгуулан Х ХХК-д мод бэлтгэх, худалдах, тээвэрлэх боломжоор хангаж давуу байдал бий болгосон хэрэгт холбогдож прокуророос яллах дүгнэлт үйлдэн хэргийг шүүхэд шилжүүлжээ.

Анхан шатны шүүх: Шүүгдэгчийн Эрүүгийн хуулийн тусгай ангийн 22.1 дүгээр зүйлийн 1-д заасан Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглах гэмт хэрэг үйлдсэн гэм буруутайд тооцож нийтийн албанд ажиллах эрхийг 2 жилийн хугацаагаар хасаж, 1 жилийн хугацаагаар зорчих эрх хязгаарлах ял оногдуулж шийдвэрлэлээ.