Иргэн Б.Л нь 2023 онд хоёр өрөө орон сууцыг, авто зогсоолын хамт Э.Х-с худалдаж авсан. Орон сууцыг худалдахдаа авто зогсоолыг 2016 оноос хойш эзэмшиж байгаа байрыг барьсан компани сураггүй болсноор авто зогсоолд өмчлөлийн гэрчилгээ гаргуулах боломжгүй болсон гэж тайлбарлан СӨХ-ны тодорхойлолтын хамт авто зогсоолыг хүлээлгэн өгсөн. Байр авсны дараа хажуу өрөө хөлсөлсөн хүнд зогсоолоо ашиглуулсан ч тэр хүн ашиглаагүй, харин байрны оршин суугч О.Г нь зогсоолд автомашинаа тавьж өвөлжсөнийг байрны СӨХ-ны даргаас мэдэж, хавар нь О.Г-тэй утсаар ярьж автомашинаа гаргах талаар шаардлага тавихад энэ зогсоол ямар ч бичиг баримтгүй, би хүнээс худалдаж авсан гэдэг, зогсоолоос автомашинаа холдуулж чөлөөлж өгөөгүй учраас ашиглах боломжгүй болсон гэж марган, авто зогсоолын эзэмшигчээр тогтоолгохоор Б.Л шүүхэд хандсан.

Анхан шатны шүүх: Нэхэмжлэгч Б.Л нь маргаан бүхий авто зогсоолыг орон сууц худалдах, худалдан авах гэрээгээр эзэмшилдээ шилжүүлж авсан нь сууц өмчлөгчдийн холбооны тодорхойлолт, Э.Х-ийн гэрчээр өгсөн мэдүүлэг зэргээр тогтоогдсон, өмчлөгч хөрөнгөө бусдын хууль бус эзэмшлээс шаардах эрхтэй гэх дүгнэлтийг хийж авто зогсоолыг хариуцагч О.Г-ийн эзэмшлээс чөлөөлж шийдвэрлэсэн.

Давж заалдах шатны шүүх: Нэхэмжлэгч Б.Л нь маргаан бүхий авто зогсоолыг иргэн Э.Х-с худалдан авах замаар эзэмшилдээ авсан болохыг тогтоосон анхан шатны шүүхийн дүгнэлт үндэслэлтэй, нэхэмжлэгч нь тухайн эд хөрөнгийн хууль ёсны эзэмшигч тул авто зогсоолыг бусдын хууль бус эзэмшлээс шаардах эрхтэй гэх дүгнэлтийг хийж, анхан шатны шүүхийн шийдвэрт хууль хэрэглээний өөрчлөлт оруулж шийдвэрлэсэн.

Хяналтын шатны шүүх: Хэргийн үйл баримт, нотлох баримтыг зөв үнэлж дүгнэсэн мөн маргааны талаар шийдвэрлэсэн анхан болон давж заалдах шатны шүүхийн дүгнэлт үндэслэлтэй ч хэргийн зүйлчлэл зөв гарч чадаагүй, нэхэмжлэгч нь авто зогсоолын эзэмшигчээр тогтоолгох шаардлага гаргасан тул шийдвэр, магадлалд Иргэний хуулийн 92 дугаар зүйлийн 92.1. Шударга эзэмшигчийн эд хөрөнгө түүний эзэмшилд нь байгаа боловч эзэмших, ашиглах эрхээ хэрэгжүүлэхэд хэн нэгэн этгээд саад болж байвал уг саадыг арилгуулахаар өмчлөгчийн нэгэн адил шаардах эрхтэй гэж заасныг баримтлан хууль хэрэглээний өөрчлөлт оруулж, шийдлийг хэвээр үлдээж, хариуцагчийн итгэмжлэгдсэн төлөөлөгчийн хяналтын журмаар гаргасан гомдлыг хангахгүй орхиж шийдвэрлэлээ.