Сүүлийн жилүүдэд Улаанбаатар хот ТҮЦ-гүй болох бодлогыг тууштай хэрэгжүүлж, хотын төвийн эмх замбараагүй байдлыг цэгцлэх, явган хүний орчныг чөлөөлөх, өнгө үзэмжийг сайжруулах чиглэлд нэлээд хатуу арга хэмжээ авсан. Албадан буулгалт, нүүлгэн шилжүүлэлт нь маргаантай байсан ч “ТҮЦ-гүй нийслэл” гэсэн зорилго тодорхой харагдаж эхэлсэн.

Өнгөрсөн жил гэхэд л нийслэлийн бүх ТҮЦ-нүүдийг албадан ачиж, нийслэл болон ТҮЦ эрхлэгчдийн дунд маш том хагаралдаан үүссэн. Үүний үр дүнд хотын төвөөр шаваад байсан ТҮЦ-нүүд байхгүй болж, хэсэг хугацаа өнгөрлөө.

Гэтэл Баянгол дүүргийн Засаг даргын Тамгын газраас /2026-02-13/-ны өдөр гаргасан албан бичгээрээ 24 дүгээр хороонд ТҮЦ дахин байршуулах боломжтой эсэх талаар иргэдээс санал авахыг хүссэн байна. Тодруулбал,

• “Алтай хотхоны автобусны буудал дээр 1 ТҮЦ”
• “Дэм эмнэлгийн байрны урд талд 1 ТҮЦ” байршуулах боломжтой эсэхийг судалж, иргэдээс санал авч албан хариу ирүүлэхийг дурджээ.

Мөн хэрэв боломжгүй гэж үзвэл шалтгааныг тодорхой тайлбарлах, 2026 онд тохижилт, бүтээн байгуулалтын ажил төлөвлөгдсөн эсэхийг тусгахыг чиглэл болгосон байна.

Ийм жишиг тогтвол бусад дүүргүүд ч адилхан шийдвэр гаргах магадлалтай. Ингэснээр саяхан хүчээр буулгасан, маргаан дагуулсан шийдвэрүүд утгаа алдаж, хотын бодлого тогтворгүй, түр зуурын шинжтэй харагдах эрсдэл буй.

Нөгөө талаас жижиг бизнес эрхлэгчдээ дэмжих, иргэдэд ойр үйлчилгээ бий болгох шаардлага бий. Гэхдээ бодлого нэг гараараа буулгаж, нөгөө гараараа буцаан тавьдаг байж таарахгүй.