Сүхбаатар дүүргийн 6-р хорооны нутаг дэвсгэрт 26-р байрны дахин төлөвлөлтийн асуудал олны анхаарлын төвд байна. 50 гаруй айл өрх Г хэлбэрийн хуучны энэ орон сууцанд амьдарч байсан. "Улаанбаатар орон сууцжуулалт" ХХК-иас эл байршилд дахин төлөвлөлт хийх сонгон шалгаруулалт зарласнаар "Азийн идэр цамхаг" ХХК орж ирсэн. 

Ер нь бол оршин суугчид сүүлийн хэдэн жил дахин төлөвлөлтийн асуудлаар уулзалдаж, зөвлөлдөж байсан. Ингээд одоогоос хоёр жилийн өмнө буюу нийслэлээс сонгон шалгаруулалт зарлахаас хамаагүй өмнө "Азийн идэр цамхаг" компани тус орчинд байр түрээслэн оффислож, оршин суугчидтай нэг нэгээр нь уулзаж "тохироо" хийж эхэлсэн гэдэг. Улмаар сонгон шалгаруулалт болоход энэ компани шалгарлаа гэх батламж үзүүлж, ажлаа шуурхайлсан. Татгалзаад байгаа гэх өрхийн тухайд "Азийн идэр цамхаг" компанийн захирал өмнө нь "Олон хүүхэдтэй юм байна лээ шүү, мэнд устай яваарай" хэмээн дарамт үзүүлсэн байдлаар харьцаж байсан. Шалгараад ороод ирэхээр нь энэ компани хотын төвд 16 давхар барилга барих чадамжтай эсэх дээр нягтлах алхам хийсэн. Гэтэл үндсэн хөрөнгө нь 20 гаруй сая төгрөг, барилгы угсралтын зөвшөөрлөө аваад удаагүй мөн өмнө гүйцэтгэсэн гэх төслүүд нь иргэдийг хохироосон зэрэг асуудлууд гарч ирснээр энэ айл гэрээнд гарын үсэг зурахгүй гэсэн ажээ. 

Улмаар холбогдох газруудад үүсээд байгаа нөхцөл байдлаараа хандаж хүсэлтээ өгсөөр өнөөдрийг хүрчээ. 

Товчхондоо бол уг айлын шаардлага нь, 

• Сонгон шалгаруулалт ил тод нээлттэй явагдсан эсэх 
• Санхүүгийн болон барилга угсралт чиглэлээр чадамжгүй ААН орж ирсэн 
• Иргэний нэрийн өмнөөс гэрээнд гарын үсэг зурсан, хутгатай иргэн явуулсан
• Гэрээ нь иргэний эрхийг зөрчсөн
• Хашаа барих, буулгах процесс нь хууль бусаар үйлдэгдсэн зэрэг шалтгаантай ажээ.