Хуульч Р.Булгамаа хүний эрхийн зөрчлийн эсрэг авахаар төлөвлөж буй арга хэмжээний талаар "БНСУ-ын хил дээр Монгол Улсын Иргэдтэй ийнхүү зүй бус, доромжилж харьцах байдал дахин дахин үргэлжилсээр байх юм бол Монгол Улсын Засгийн газраас 2025 оны 12 дугаар сарын 31-ний өдөр гаргасан "БНСУ-ын иргэдийг визгүй зорчуулах" тухай шийдвэрийг хүчингүй болгуулахаар Захиргааны хэргийн шүүхэд хандах болно. Энэ бол тусгаар тогтносон Монгол Улсын иргэдийн Хууль ёсны эрхийн төлөөх үйл хэрэг байх болно. Стратегийн өмгөөлөл хийж хамтран ажиллах хуульчдыг урьж байна." хэмээсэн. 

Тэгвэл Монгол Улсаас Бүгд Найрамдах Солонгос Улсад суугаа ЭСЯ-наас мэдэгдэл гаргалаа. Тодруулбал "010-9595-3464 гэсэн шуурхай утас болон [email protected] цахим хаягт иргэдийн хүсэлт, гомдол, өргөдлийг тогтмол хүлээн авч, мөрөөр нь ажилладаг. Энэ оны 2 дугаар сарын 8-ны өдөр хил дээрээс буцаагдсан, хүний эрх зөрчигдсөн гэх өргөдөл, гомдол, хүсэлт ирээгүй байна. Хэрэв суугаа улсын Хилийн шалган нэвтрүүлэх албаны байцаагч тодруулга авах, шалгах явцад тухайн иргэний эрх зөрчигдсөн гэж үзэх гомдол байгаа бол нотлох баримтын хамт ЭСЯ-аар дамжуулан БНСУ-ын Хүний эрхийн хороо, Хилийн шалган нэвтрүүлэх албаны дотоод хяналт зэрэг зохих байгууллагад хүргүүлж, шалгуулах боломжтой байдаг. Гэтэл ЭСЯ-ны шуурхай утас, цахим хаягт зохих хүсэлт, гомдол ирүүлэхгүйгээр, мэдээлэхгүйгээр зарим иргэд олон нийтийн сүлжээгээр дамжуулан буруу, ташаа мэдээлэл гаргаж байгаад харамсаж байна. Монгол Улсаас гадаад улсад суугаа нийт Дипломат төлөөлөгчийн газар иргэдийнхээ хууль ёсны эрх ашгийг хамгаалах үүргээ тууштай, ямар ч нөхцөлд гүйцэтгэж байгааг үүгээр мэдэгдэж байна” гэжээ.