Хэт холын марафон буюу 6/12/24 цагийн Улсын аварга шалгаруулах тэмцээн 8 дугаар сарын 12, 13-ны өдрүүдэд Улаанбаатар хотноо зохион байгуулагдаж, Зэвсэгт хүчний алба хаагчид зарим төрөлд нь тэргүүлсэн бахдам амжилт үзүүлэв. 

Тухайлбал, Зэвсэгт хүчний 327 дугаар ангийн мотобуудлагын батальоны Хангалт үйлчилгээний тасгийн салааны нярав, ОУХМ, дэд ахлагч Баяраагийн Сарангуа 18-35 насны ангиллын 6 цагийн марафоныг 73 км 214 метр туулсан амжилтаар тэргүүлж, Монгол Улсын рекордыг шинэчиллээ. 

Мөн Зэвсэгт хүчний 032 дугаар ангийн цэргийн цагдаа, ОУХМ, ахлах ахлагч Чулуудайн Батжаргал 35-39 насны ангиллын 24 цагийн марафон гүйлтэд 180 км зам туулж, улсын аваргын алтан медаль хүртлээ. 

Дэд ахлагч Б.Сарангуа нь шинэчилсэн 6 цагийнхаа рекордоос гадна 2018 онд 24 цагийн улсын аварга, 2019 онд 12 цагийн улсын аваргаар тодорч, рекордыг нь ахиулан тогтоосон  тамирчин юм.  Харин ахлах ахлагч Ч.Батжаргал 2015 онд 12 цагийн марафоныг 135 км зам туулсан амжилтаар 9 жил рекорд эзэмшигч байсан бол өнгөрсөн өдрүүдэд болсон тэмцээнээр түүний амжилт эвдэгджээ.

Ташрамд онцлоход, Монгол Улсын хэт холын марафоны холбооноос улсын аваргад тэргүүлсэн тамирчдыг 12 дугаар сард Тайваньд зохион байгуулагдах дэлхийн аваргад оролцуулахаар шийдвэрлэсэн байна. Ингэснээр Зэвсэгт хүчний дээрх алба хаагчид хэт холын марафон гүйлтийн дэлхийн аварга шалгаруулах тэмцээнд оролцох болзлоо хангаад байгаа юм.