Дүнжингаравын уулзварт 2024 оны 1 сард газ тээвэрлэж явсан автомашин “Patrol” маркийн автомашинтай мөргөлдөж улмаар хүний амь нас, эрүүл мэнд, эд хөрөнгө хохирсон харамсалтай явдал болсон. Энэ явдлаас хойш төр засгаас дэлбэрэлтэд өртсөн 207-р байрны оршин суугчид түрээсийн байрны мөнгө олгож , мөн цаашлаад 207-р байрыг нурааж шинээр барихаар болж асуудлыг шийдвэрлэсэн. Тэгвэл дэлбэрэлтийн үеэр золгүй байдлаар амиа алдсан иргэдийн ар гэрийнхэн төр засагт гомдолтой байгаа талаар мэдээлэл хийлээ. Тэдний хувьд өнгөрөгч 1-р сарын 24-нд мэдээлэл хийж төрийн 3 өндөрлөгт хүсэлт хүргүүлсэн. Гэвч өнөөдрийг хүртэл хариу өгөөгүй тул дахин мэдээлэл хийлээ.

Иргэн Б.Гантулга: 

Дэлбэрэлтийн үеэр аавыгаа алдсан. Аав минь улсдаа 36 жил ажиллаад, хөдөлмөрлөөд ганцхан жилийн дараа тэтгэвэртээ гарах гэж байсан. Орон сууцны конторт насаараа ажилласан хүн. Сайхан аавыг минь харахын эцэсгүй болгож, амийг нь авчихаад биднийг хөсөр хаясан. Аав минь эгэл жирийн хөдөлмөрлөж, сүүлийн таван жил давхар ажил хийж байсан. Гэтэл аймшигтай болгосон.Төрөөс биднийг анхаартал шаардлага хүргүүлнэ. 207-р байрны асуудлыг шийдчихээд биднийг яагаад орхив. Осол болсон үед сэтгэл санааны хохирол гэж яригдсан ч авч чадаагүй. 18 сарын дараа шүүх эмнэлэгт очиж, хохирлоо тогтоолгосон. Гэвч өнөөдрийг хүртэл нэг ч төгрөг аваагүй. Хэрэг нь шийдэгдэхгүй 2 жил боллоо. Ээж минь аавыг өнгөрснөөс хойш ганцаараа гэртээ байж чадахгүй маш их бэтгэрдэг болсон.