Б.Д нь Б.Н-д 88,5 сая төгрөгийг сарын хугацаатай, 6.5 хувийн хүүтэй, 0.1 хувиар алданги тооцож зээлийн гэрээ байгуулсан, улмаар гэрээг дахин 1 жилийн хугацаагаар сунгаж, алдангийг хоногийн 0.5 хувь болгон өөрчилсөн. Б.Н нь 2018 оны 11 сард 30 сая төгрөг төлсөн мөн 2019 оны 04 сар хүртэл хугацааны хүүг төлж үүнээс хойш төлбөр төлөөгүй. Үндсэн зээл 70 сая төгрөг, үүний алданги 35 сая төгрөг, нийт 105 сая төгрөгийг шаардахад, Б.Н нь зээлийн гэрээний дагуу Б.Д-с мөнгө шилжүүлж аваагүй, харин Х.Х-с мөнгө авсан, буцаан төлсөн. Зээлийн гэрээ нь зээлдүүлэгч зээлдэгчид мөнгийг шилжүүлснээр байгуулагдсанд тооцогддог гэх тайлбар гарган маргалджээ.

Анхан шатны шүүх: Талуудын хооронд зээлийн гэрээ байгуулагдсан, гэрээг бичгээр байгуулж хүү, алданги тохирсон, талууд гарын үсэг зурсан байна. Хариуцагч Б.Н нь 2019 оны 06 сарын 19-ний өдрөөс шүүхэд нэхэмжлэл гаргасан 2025 оны 04 сар хүртэлх хугацаанд зээлийн төлбөр 70 сая төгрөг төлөх үүргээ биелүүлээгүй тул уг хугацаанд ногдох алдангийг төлөх үүрэгтэй гэх агуулгатай дүгнэлтийг хийж нэхэмжлэлийн шаардлагыг хангаж хариуцагчаас 105 сая төгрөгийг гаргуулахаар шийдвэрлэсэн.

Давж заалдах шатны шүүх: Анхан шатны шүүх нотлох баримтыг бүрэн үнэлэлгүй, тооцооллын алдаа гаргасан. Нэхэмжлэгч хамтран амьдрагч Х.Х-р дамжуулан өөрийн мөнгөн хөрөнгийг захиран зарцуулж, буцаан өөрийн болон Х.Х-н дансаар зээлийн төлбөр хүлээн авдаг байсан нь түүний тайлбараар нотлогдож байна. Х.Х-н дансанд орсон 73,3 сая төгрөгийг нэхэмжлэгч, хариуцагч нарын хооронд үүссэн зээлийн гэрээний үүрэгт тооцох үндэслэлтэй. Иймд хариуцагч зээлийн гэрээний үүрэгт 137,7 сая төгрөг төлөхөөс нэхэмжлэгчид шилжүүлсэн автомашины үнэ 30 сая төгрөг, Б.Д болон Х.Х нарын дансаар төлсөн 93 сая төгрөгийг тус тус хасаж тооцож, зээлийн гэрээний үүрэгт 14,6 сая төгрөг, алданги 7,3 сая төгрөг, нийт 21,9 сая төгрөгийг гаргуулах үндэслэлтэй гэх дүгнэлтийг хийж шийдвэрт өөрчлөлт оруулсан.

Хяналтын шатны шүүх: Анхан болон давж заалдах шатны шүүх талуудын хооронд зээлийн гэрээний харилцаа үүссэн талаар үндэслэлтэй дүгнэсэн, давж заалдах шатны шүүх зээлийн гэрээний үүргийн хэмжээг тодорхойлохдоо тооцооллын алдаа гаргасныг залруулж хариуцагч зээлийн гэрээний үүрэгт 137,7 сая төгрөг төлөхөөс 75,4 сая төгрөгийг нэхэмжлэгчид төлсөн нь хэрэгт авагдсан баримтаар тогтоогдож гэх агуулгатай дүгнэлтийг хийж зээлийн үлдэгдэл төлбөр 62,2 сая төгрөг, алдангид 31,1 сая төгрөг, нийт 93,3 сая төгрөгийг хариуцагчаас гаргуулж, нэхэмжлэгчид олгохоор шийдвэр, магадлалд өөрчлөлт оруулж шийдвэрлэлээ.