Эх орноо хайрлах сэтгэл, байгаль дэлхийгээ хамгаалах ухамсар нас хүйс, үеийн ялгааг үл харгалзан хүн бүрийн зүрхэнд оршдог гэдгийг Баян-Өлгий аймгийн Буянт сумын “Эко клуб”-ын сурагчид бодит үйлдлээрээ харуулж байна.

Өвөлжилтийн хүндрэлтэй энэ үед идэш тэжээлийн хомсдолд орж болзошгүй зэрлэг ан амьтдад туслах зорилгоор тэд сумынхаа байгаль хамгаалагчидтай хамтран “Био техникийн арга хэмжээ” буюу өвс, тэжээл байршуулах ажлыг зохион байгуулжээ. Сурагчид өөрсдийн санаачилгаар өвс тэжээл бэлтгэж, ховор амьтдын нутагшдаг бүсэд хүргэн тавьсан нь байгаль хамгааллын бодит дэмжлэг болж байна.

Буянт сумын нутаг дэвсгэрт аргаль, янгир, тэх, ирвэс, зэрлэг гахай, алтайн хар тарвага, хойлог зэрэг нэн ховор, хамгаалалтад байдаг ан амьтад амьдардаг. Цас ихтэй, хүйтэн өвөл тэдний амьдрах орчинд хүндрэл учруулдаг тул ийнхүү био техникийн арга хэмжээ авах нь амьтдын идэш тэжээлийн хангамжийг нэмэгдүүлэх, хорогдлыг бууруулах ач холбогдолтой юм.

Ирээдүй хойч үе байгаль хамгааллын үйлсэд идэвхтэй оролцож буй нь зөвхөн тухайн бүс нутгийн төдийгүй нийт нийгмийн хувьд эерэг дохио болж байна.

Эх сурвалж: WWF Mongolia