Цахилгааны хязгаарлалтаас үүдэж олон айлын цахилгаан бараа шатаж, байшин гэр нь ч  тогны хэлбэлзлээс  болж шатжээ. Иргэдийн бухимдал холбогдох газрууд мессежээр мэдээлсэн цагтаа таслахгүй, хугацаа нь өөр үед тоггүй болоод байгаагаас эрсдэлд орж байгаа тухайгаа цахим орчинд мэдээлсээр байна.  

Цахилгаан гэнэт тасарснаас болж үйлдвэр, үйлчилгээний газрын тоног төхөөрөмж, механизм эвдэрч гэмтсэн тохиолдолд тухайн иргэн, аж ахуйн нэгж хохирлоо хууль ёсоор нэхэмжлэх боломжтой. Эрчим хүч нийлүүлэх, түгээх байгууллага нь хэрэглэгчийг тасралтгүй, найдвартай цахилгаанаар хангах үүрэгтэй бөгөөд үйлчилгээний доголдлоос үүдэн хохирол учруулсан бол хариуцлага хүлээх хуультай. Иргэний хуульд зааснаар гэм хор учруулсан этгээд хохирлыг бүрэн барагдуулах үүрэгтэй бөгөөд Эрчим хүчний тухай болон Хэрэглэгчийн эрхийг хамгаалах тухай хуулиар хэрэглэгч үйлчилгээний алдаанаас үүдсэн хохирлоо нэхэмжлэх эрхтэй. Урьдчилан мэдэгдэлгүй, огцом болон давтамжтайгаар цахилгаан тасалсан, техникийн стандарт зөрчсөн тохиолдолд “эрчим хүчний дутагдал” гэдэг шалтгаан нь хариуцлагаас чөлөөлөх үндэслэл болдоггүй.

Хохирлоо нэхэмжлэхийн тулд эвдэрсэн тоног төхөөрөмжийн мэргэжлийн дүгнэлт гаргуулж, засвар үйлчилгээ, сэлбэг хэрэгслийн зардлын баримтыг бүрдүүлэн цахилгаан түгээх байгууллагад албан шаардлага хүргүүлэх шаардлагатай. Хэрэв шаардлагад хариу өгөхгүй эсвэл татгалзсан тохиолдолд шүүхэд нэхэмжлэл гаргах боломжтой. Цахилгааны гэнэтийн тасалдал нь аж ахуйн нэгжүүдэд бодит хохирол учруулж байгаа тул иргэн, байгууллага бүр эрхээ мэдэж, учирсан хохирлоо хуульд заасан журмаар нэхэмжлэх нь зүйтэй.