2006 онд Малайзын улстөрч Разик Баганда 2 цагдаатай хамтран Монгол Улсын иргэн Ш.Алтантуяаг Малайзын Пункак-Алам хотын ойролцоох ойд аваачин, толгойд нь буудаж хөнөөгөөд, цогцсыг нь дэлбэлсэн хэрэг гарч байв.

20 жил амиа алдсан охиныхоо төлөө тэмцэж буй С.Шаарийбуу өнөөдөр /2026.01.20/ доод шатны шүүхийн засгийн газрын хэрэгтэй холбоотой хариуцлагаас цагаатгасан шийдвэрийг давж заалдах хүсэлтээ Холбооны шүүхэд гаргах болсноо мэдэгдээд байна.

Учир юу вэ гэвэл, Малайзын Давж заалдах шатны шүүх 2026 оны нэгдүгээр сард гаргасан шийдвэрээрээ Шах Аламын Дээд шүүх 2022 онд гаргасан, Алтантуяагийн гэр бүлд 5 сая ринггитийн нөхөн төлбөр олгох шийдвэрийг бууруулж 1.4 сая ринггит болгож, Засгийн газрыг уг хэрэгт хууль зүйн хариуцлага хүлээхгүй гэж үзсэн юм.

Шүүхийн тайлбараар, Ш.Алтантуяаг хөнөөсөн хэрэгт буруутгагдсан хоёр цагдаагийн алба хаагч тухайн үед албан үүргээ гүйцэтгэж байгаагүй тул Засгийн газар ажил олгогчийн хувиар хариуцлага хүлээх үндэслэлгүй гэж дүгнэсэн байна.

Уг шийдвэрийн дараа С.Шаарийбуу болон түүний өмгөөлөгч нар давж заалдах шатны шүүхийн дүгнэлтэд эрх зүйн ноцтой маргаантай асуудлууд байгааг онцолж, ялангуяа төрийн алба хаагчдын үйлдэлтэй холбоотой хариуцлагын асуудлыг илүү өндөр шатны шүүх дахин нягтлах ёстой гэж үзэж байгаагаа илэрхийлсэн байна.Иймд гэр бүлээс Малайзын Federal Court буюу Дээд шүүхэд гомдол гаргахаар шийдвэрлэсэн аж.