Өчигдөр /2026.01.20/ Дорнод аймгийн Онцгой комиссын хуралдаанаар улаанбурхан өвчний нөхцөл байдлын талаар хэлэлцэв.

Аймгийн Онцгой комиссын дарга, Засаг дарга Ш.Ёл нөхөн дархлаажуулалтыг богино хугацаанд бүрэн дуусгах, нэмэлт дархлаажуулалтын вакциныг ХӨСҮТ-өөс яаралтай татан авч эхлүүлэх, мөн сургуулийн орчинд халдвар хамгааллын дэглэмийг сахиулахад хяналт тавьж ажиллах чиглэлийг аймгийн Эрүүл мэндийн газар, Боловсролын газар, Хэрлэн сумын Засаг даргад тус тус өглөө.

Одоогийн байдлаар аймгийн хэмжээнд улаанбурхан өвчний 118 тохиолдол бүртгэгдээд байгаа бөгөөд халдвараар өвчлөгсдийн дийлэнх хувийг 10–15 насны хүүхдүүд эзэлж байна.

Өвчлөл голомтлон гарсан Хан-Уул болон 8 дугаар сургуульд 12 дугаар сарын 18-ны өдрөөс эхлэн голомтын дархлаажуулалтыг аймгийн Эрүүл мэндийн газраас зохион байгуулаад байна.

Улаанбурхан өвчний товлолт дархлаажуулалтыг 9 сартай болон 2 настайд хийдэг бөгөөд товлолын дархлаажуулалтад хамрагдаагүй 1900 гаруй хүүхдэд нөхөн дархлаажуулалтыг хийж байна.

Мөн улаанбурхан өвчний халдвар нь товлолт вакцины нас болоогүй 6-8 сартай хүүхэд болон 10–15 насныхны дунд тархалт өндөр байгааг харгалзан нэмэлт дархлаажуулалт хийхээр төлөвлөж бэлтгэл ажлыг хангаж байгаа аж.