32, 16 настай эмэгтэйчүүдийг хөнөөсөн Ц.Дагвадорж нь Ерөнхийлөгч асан Н.Багабандийн зээ гэх мэдээлэл цахим орчинд тараад буй.

Уг мэдээлэлтэй холбоотойгоор Н.Багабандийн охин Б.Баярмаа мэдэгдэл гаргажээ. Тодруулбал,  "Сүүлийн өдрүүдэд 16 настай охины амийг хөнөөсөн аймшигт хэргийн мэдээллүүд олон нийтийн сүлжээнд цацагдаж байна. Юун түрүүнд тухайн хэргийн хохирогч болсон охины ар гэр, ойр дотныхонд гүн эмгэнэл илэрхийлье. Түүнчлэн олон нийтийг цочроосон, санаанд багтамгүй уг аймшигт хэрэгт хамааралгүй хүмүүсийг зориуд холбоотой мэтээр бичиж, олон нийтийн сүлжээнд байршуулж байгаад гүнээ харамсаж байна. Тодруулбал, уг хэрэгт яллагдагчаар татагдаад байгаа Дагвадоржийг иргэн Б.Баярмаа миний хүү хэмээн гүтгэж, илт худал, санаанд оромгүй мэдээллийг олон нийтийн сүлжээнд тарааж байгаад туйлын гайхаж, маш их цочирдлоо. Манай гэр бүл болон хамаатан садан уг хэрэгт холбогдогчтой ямар нэгэн байдлаар огт холбоогүй болохыг албан ёсоор хариуцлагатайгаар мэдэгдэж байна. Бид хохирогчдын ар гэрийнхнийг хүндэтгэж, өнөөдрийг хүртэл ямар нэгэн байдлаар мэдэгдэл гаргаагүй болно. Худал мэдээлэл газар авч, бусдыг тавгүйтүүлж, эргэлзээ төрүүлж байгаа учир арга буюу уг мэдэгдлийг гаргаж байна. Иймд олон нийтийн сүлжээнд санаатайгаар худал мэдээлэл тарааж, олон нийтийг төөрөгдүүлсэн энэхүү үйлдлийг хууль хяналтын байгууллагад мэдэгдэж, таслан зогсоох арга хэмжээ авах болно. Багабандийн Баярмаагийн гэр бүл" гэв.