БНХАУ-д амьсгалын замын халдварт өвчин үүсгэдэг риновирусийн халдварын тохиолдол нэмэгдэж, зарим бүс нутагт өргөн хүрээнд тархаж байгаа талаар гадаадын эрүүл мэндийн байгууллагууд болон хэвлэл мэдээллийн хэрэгслүүд мэдээллээ. Риновирус нь шинэ төрлийн вирус биш боловч халдварлах чадвар өндөр, олон замаар дамжин тархдаг тул иргэдийг анхаарал болгоомжтой байхыг анхааруулж байна.

Риновирусийн халдвар авсан үед хамар битүүрэх, нус гоожих, хоолой өвдөх, ханиалгах, халуурах зэрэг ханиад томуу төст шинж тэмдэг илэрдэг. Ихэнх тохиолдолд хөнгөн явцтай боловч бага насны хүүхэд, өндөр настан, архаг хууч өвчтэй болон дархлаа султай хүмүүсийн хувьд хүндрэх эрсдэлтэйд тооцогддог.

Энэхүү вирус нь агаар дуслын замаар, мөн ахуйн хавьтлаар буюу бохир гар, вирусээр бохирдсон эд зүйлсээр дамжин халдварладаг. Тухайлбал, халдвартай хүн ханиах, найтаах үед вирус агаарт тархаж, ойр орчимд байгаа хүмүүс халдвар авах боломжтой. Мөн хаалганы бариул, гар утас зэрэг нийтлэг хэрэглээний зүйлсээр дамжин халдварлах эрсдэлтэй байна.

Одоогоор риновирусийн эсрэг тусгай вакцин байхгүй тул халдвараас урьдчилан сэргийлэх нь хамгийн чухал арга гэж мэргэжилтнүүд зөвлөж байна. Үүнд гараа савандаж тогтмол угаах, олон нийтийн газар амны хаалт зүүх, хүн олноор бөөгнөрөхөөс зайлсхийх, өрөө тасалгааг тогтмол агааржуулах, амьсгалын замын өвчний шинж тэмдэг илэрсэн тохиолдолд бусдад халдвар тараахаас сэргийлж гэртээ амрах шаардлагатай юм.

Риновирус нь олон зуун өөр өөр төрлөөр тархдаг бөгөөд эдгээр нь хоорондоо маш их ялгаатай байдаг тул нэг вакцин бүх төрлийн риновирусээс хамгаалах боломжгүй юм. Энэ олон янз байдлын улмаас шинжлэх ухаанд вакцин хөгжүүлэх нь маш хүндрэлтэй хэвээр байна.

Эрүүл мэндийн байгууллагууд иргэдийг баталгаагүй эх сурвалжаас мэдээлэл авахгүй байх, халдварын шинж тэмдэг илэрвэл эмчид яаралтай хандаж, өөрийгөө болон ойр дотнын хүмүүсээ хамгаалахыг уриалж байна.