Эхнэрээ олон удаа хутгалж хөнөөсөн Н.Энхбат Улсын дээд шүүхэд гомдол гаргажээ.

Түүний гомдлын гол агуулга нь "Үр хүүхдэдээ зовлон шаналал авч ирсэндээ гэмшиж байна. Гурван хүүхдээ харж хандах хүнгүй ирээдүйг нь бүрсгэр үлдээсэндээ сэтгэл зовж байгаа тул итгэл уучлалт үзүүлж бүх насаар хорих ялыг өөрчилж өгнө үү. Хорих ангид хөдөлмөр эрхлэх шагналыг хоногоор урамшуулан, суллагдах боломжийг хангаж өгнө үү" хэмээжээ. 

Н.Энхбатын гурван хүүхэд хэрэг гарснаас хойш аавынхаа ах дүүс дээр байгаа. Дүүргийн холбогдох газруудаас том хүү нь насанд хүрсэн тул хоёр дүүгийнх нь асран хамгаалагчаар тогтоохоор үйл явц үргэлжилж буй гэх мэдээлэл бий. Харин шүүх Н.Энхбатаас 162 сая төгрөгийг гаргуулж, том хүү Э.Д-гийн сэтгэцийн хохирол, хор уршгийн зардалд олгохоор шийдвэрлэсэн. 

Харин давж заалдах шатны шүүхээс  "Н.Энхбатын үйлдсэн гэмт хэрэг, гэмт хэргийн нийгмийн аюулын шинж чанар, хэр хэмжээ, гэмт хэрэг үйлдсэн нөхцөл байдал, учирсан хохирол, хор уршгийн шинж чанар, шүүгдэгчийн хувийн байдалд анхан шатны шүүхээс оногдуулсан бүх насаар нь хорих ял тохирсон, Гэр бүлийн тухай хуульд зааснаар амь хохирогчийн хүүхэд болох охин Э.Э (12 настай), охин Э.Э (7 настай) нарт асран хамгаалагч томилох асуудлыг хуульд заасан журмын дагуу шийдвэрлэхийг Баянгол дүүргийн Засаг даргад үүрэг болгож шийдвэрлэсэн нь үндэслэлтэй байна гэж үзэж, шийтгэх тогтоолыг хэвээр үлдээж шийдвэрлэв" хэмээсэн байдаг.