Өвөлжилт хүндэрсэн энэ үед хилчид маань зөвхөн улсын хилийг хамгаалаад зогсохгүй нутгийн малчдад бодитой туслалцаа үзүүлж байна. Алдуул мал, адууг олж тогтоон эзэнд нь хүлээлгэн өгөхөөс гадна шаардлагатай тохиолдолд эзэд нь иртэл түр маллан хамгаалж буй нь тэдний ажлын нэгээхэн хэсэг юм.

Хилийн бүсэд олон тооны мал, адуу уруудан орж ирсэн тул тухайн бүсэд оторлон маллуулах зохион байгуулалт хийжээ. Ингэснээр мал сүрэг хилийн зурвас давж, эрсдэлд орохоос урьдчилан сэргийлж байна. Тухайлбал, Хилийн цэргийн 0306 дугаар ангиас томилогдсон “Хөдөлгөөнт хилийн харуул”‑ын бүрэлдэхүүн хүчтэй шуурганы үед шуурхай ажиллаж, хилийн дугаар тэмдгийн чиглэлээр улсын хилд тулсан малыг дроноор илрүүлэн, нутгийн гүн рүү татан оруулж байжээ. Энэ нь иргэдэд учирч болзошгүй хохирлыг багасгах, мал сүргийг эрсдэлээс хамгаалах чухал ач холбогдолтой юм. Хилчдийн энэхүү хариуцлагатай, хүнлэг үйл ажиллагаа нь хүнд цаг үед төр, иргэн хоёрын харилцан түшилцэж буйн тод жишээ болж байна.