Германы баруун хэсгийн Аахен хотын шүүх өвчтөнүүдэд зөвшөөрөлгүйгээр хүчтэй эм, тайвшруулах бодис тарьж, олон хүний аминд хүрсэн 44 настай сувилагчид бүх насаар нь хорих ял оноосон байна. Шүүхээс түүнийг 10 хүний амь насыг санаатайгаар хөнөөж, 27 хүнийг амь насаа алдах бодит аюулд оруулсан гэж үзжээ.

Мөрдөн шалгах явцад тогтоосноор уг сувилагч нь асрамж, хөнгөвчлөх эмчилгээний тасагт ажиллах хугацаандаа өвчтөнүүдэд морфин болон бусад хүчтэй үйлчилгээтэй эмийг эмчийн зааваргүйгээр их хэмжээгээр тарьж байсан байна. Прокурорын зүгээс түүнийг ажлын ачааллаа багасгах, өвчтөнүүдийг “намжаах” зорилгоор ийм үйлдэл хийсэн байж болзошгүй гэж мэдэгджээ.

Шүүх хэрэг үйлдсэн байдлыг “онц хүнд гэмт хэрэг” хэмээн дүгнэж, хорих ялыг хугацаанаас өмнө суллагдах боломжгүйгээр тогтоосон нь Германы хуулийн дагуу хамгийн хүнд ялд тооцогддог байна. Энэхүү шийдвэрийг 2025 оны арваннэгдүгээр сарын эхээр гаргасан талаар гадаадын хэвлэлүүд мэдээлжээ.