Төрийн аудитын тухай хуулийн дагуу “Эрдэнэс алт ресурс” ХХК-ийн санхүүгийн тайланд Үндэсний аудитын газраас аудит хийж, хязгаарлалттай санал дүгнэлт гаргасан байна.

 Аудитын тайланд дурдсанаар, санхүүгийн тайланд хийсэн шалгалтаар нийт 8.5 тэрбум төгрөгийн зөрчил илэрсэн нь аудитын явцад тогтоосон материаллаг байдлын түвшнээс давсан боловч санхүүгийн тайланд өргөн хүрээнд тархаагүй гэж дүгнэжээ.

Тодруулбал, хаягдлын сангийн даланг өндөрлөх, лагын насос суурилуулах нийт 4.3 тэрбум төгрөгийн ажлыг гүйцэтгүүлэхдээ худалдан авах ажиллагаа зохион байгуулаагүй, харин хөрс хуулалт, олборлолт, өрөмдлөгийн ажил гүйцэтгэдэг туслан гүйцэтгэгч компанитай нэмэлт ажил нэрийн дор шууд гэрээ байгуулсан нь хууль тогтоомжийн шаардлагыг зөрчсөн гэж үзсэн байна. Мөн ажлын гүйцэтгэл гараагүй байхад туслан гүйцэтгэгч нарт нийт 2.88 тэрбум төгрөгийн урьдчилгаа төлбөр олгосон нь холбогдох хэд хэдэн хуулийн заалтад нийцээгүй зөрчилд тооцогджээ.

Аудитын дүнгээр нийт 8,521.8 сая төгрөгийн таван төрлийн зөрчил илэрснээс 32.9 сая төгрөгийн зөрчилд нэг төлбөрийн акт тогтоосон байна. Харин 4,360.1 сая төгрөгийн зөрчилд хоёр албан шаардлага хүргүүлсэн бөгөөд өмнөх оны аудитаар өгсөн, худалдан авалттай холбоотой албан шаардлагыг бүрэн хэрэгжүүлээгүйтэй холбогдуулан 1,248.8 мянган төгрөгийн зөрчилд хариуцлага тооцох албан шаардлага мөн хүргүүлжээ. Үүнээс гадна 2.88 тэрбум төгрөгийн зөрчилд нэг зөвлөмж өгсөн байна.

Ингэснээр “Эрдэнэс алт ресурс” ХХК-ийн санхүүгийн үйл ажиллагаанд хууль, журам зөрчсөн хэд хэдэн ноцтой асуудал илэрснийг Үндэсний аудитын газар онцолж, зөрчлийг арилгах, цаашид давтан гаргахгүй байх шаардлага тавьжээ.