2026 оны Нэгдүгээр сарын 03-ны өдөр Увс аймгийн Малчин суманд менингитийн халдварт өвчний 1 тохиолдол лабораторийн шинжилгээгээр батлагдсан байна.

Уг тохиолдол нь 5 настай хүүхэд бөгөөд одоогоор биеийн байдал хүнд байгаа аж.

ЭМГ болон НЭ-ийн шуурхай баг Малчин суманд ажиллаж, ойрын хавьтлын судалгаа хийж, 36 хүнийг тархвар судлалд хамруулан, назофарингитын үзлэг хийж, 25 хүнээс хоолойн арчдасны шинжилгээ авахад нэг хүн нян тээгч болох нь тогтоогдсон талаар холбогдох байгууллагаас мэдээллээ.

Мөн Малчин сумын төвийн Цалгар багийн 11 өрхийн 45 хүнд менингит өвчний талаар сургалт, мэдээлэл өгч, урьдчилан сэргийлэх хими сэргийлэлт хийсэн бөгөөд үүнээс 0–15 насны 16 хүүхэд, үлдсэн нь насанд хүрэгчид байна.

Менингококкт халдвар нь агаар дуслын замаар дамжин хурдан тархдаг бөгөөд бага насны хүүхдүүд, дархлаа султай хүмүүст илуу аюултай.

Гол урьдчилан сэргийлэх аргууд:

• Хүйтэнд тохируулан дулаан хувцаслах
• Гараа тогтмол угаах
• Өрөөгөө агааржуулж, чийгтэй цэвэрлэгээ хийх
• Витаминлаг хоол хүнс хэрэглэх
• Эмчийн зөвлөгөө авч, шинжилгээнд хамрагдах