Ховд аймгийн 16 сум, Жаргалант сумын 12 багийн 28 багийн 1000 гаруй тамирчид оролцож буй “Найрсаг Эко Ховд-2023 оюутан залуучуудын спортын их наадам”-ын нээлтийн ёслол боллоо.

Аймгийн төв талбайд зохион байгуулсан нээлтийн арга хэмжээнд сагс, волейбол, хөл бөмбөг, шатар, даам, ширээний теннис, уулын дугуй, буухиа зэрэг спортын найм, урлагийн  төрлөөр өрсөлдөж буй баг, тамирчид сум, багийнхаа туг, далбаа барин жагслаа.

Наадамд оролцогчдод аймгийн Засаг дарга, баруун бүсийн зөвлөлийн дарга Энхбатын Болормаа амжилт хүсэж үг хэлэв. Тэрбээр,

"Тэмцээний өдрүүдэд та бүхэн өрсөлдөхөөсөө илүүтэйгээр хамтдаа хөгжиж, халуун дулаан уур амьсгал бүрдүүлэн, найзалж нөхөрлөн, олон сайхан дурсамж бүтээнэ гэдэгт итгэлтэй байна. 

Цаашид бид залуучуудын сурч, хөгжих, чөлөөт цагийг зөв боловсон өнгөрөөх боломжийг бүрдүүлсэн олон үйл ажиллагаа, арга хэмжээнүүдийг хийхээр төлөвлөж байгаа. Оюутан, залуучуудынхаа хөгжил, оролцоог бид үргэлж дэмжин ажиллах болно. 

Энэхүү наадмыг хамтран зохион байгуулж буй спортод ээлтэй, дэмжин хөгжүүлэхэд сэтгэл зүрхээ зориулдаг хүн бүрд ЧИН сэтгэлийн ГҮН талархал илэрхийлье" гэлээ. 

Мөн аймгийн ИТХ-ын дарга Г.Пүрэвганди тэмцээнд оролцогч залууст баяр хүргэж амжилт хүслээ. 

Үүнээс гадна тус наадмыг хамтран зохион байгуулагч УИХ-ын гишүүн, Зам тээврийн хөгжлийн сайд С.Бямбацогтын илгээсэн "МЭНДЧИЛГЭЭ"-г танилцуулав.

Нээлтийн үеэр сум, сумын шилдэг тамирчид ялалт, амжилтын илэрхийлэл болсон "ГАЛТ БАМБАР"-ыг гараас гарт буухиалан асаалаа.