Алс баруун хязгаар Ханхөхий нутгийн малчин ардын ууган хүү Монгол Улсын гавьяат барилгачин, Ардын армийн хурандаа Манкадайн Мөнхбатын “ХАНХӨХИЙН ГАВЬЯАТ ХУРАНДАА” дурсамж, дурдатгал ном уншигч та бүхний гар дээр очиход бэлэн боллоо.

“Бурхан хүнийг бүтээсэн. Бусдыг нь барилгачид бүтээдэг” гэсэн сайхан үгийг бодит амьдралд бүтээлчээр хэрэгжүүлж, “Бурхантын хөндий”-д найрамдлаар овоглосон “Дархан хот”-ыг бүтээн байгуулах ажлыг оройлон удирдсан авьяаслаг зохион байгуулагч, удирдагчийн дурсамж, туршлага төдийгүй Дорнод Монголын тал нутаг, Дархан, Эрдэнэтийн бүтээн байгуулалт, Барилга-инженерийн цэргийн зарим хороо, ангиудын дайчин замналыг өгүүлэх энэхүү ном нь “Найрамдлын дархан” хотын түүхэн хуудсыг архивын баримт, нотолгоонд тулгуурлан товч боловч тодорхой харуулахыг хичээсэн, цэргийн болон хөдөлмөрийн хамт олныг удирдахад залуу дарга /захирагч/ нар юунд анхаарах, тулгамдсан асуудлыг хэрхэн шийдвэрлэж байх зэрэг түүх, судалгаа, арга туршлагын цогц бүтээл болсон юм.

Номын баяр 08 дугаар сарын 01-ний өдөр 13.00 цагт Барилга-инженерийн цэргийн удирдах газрын Хурлын зааланд зохион байгуулагдахаар бэлтгэл ажил хангагдаад байна. Дэлгэрэнгүй мэдээллийг 89160954, 99160954, 91160954 утсаар лавлана уу.

                                                       Хошууч М.ХИШИГБАЯР