ВАШИНГТОН. /Anadolu/. АНУ-ын Жо Байден өнөөдөр буюу мягмар гарагт Ромын Папын элч төлөөлөгч, хамба лам Маттео Зуппиг Вашингтонд хүлээн авч уулзана гэж Цагаан ордны хэвлэлийн нарийн бичгийн дарга Карин Жан-Пьер мэдээлжээ. 

"Ерөнхийлөгч Байден хамба лам Маттео Зуппиг долоодугаар сарын 18-нд Цагаан ордонд хүлээн авч уулзана. Хамба лам Зуппи Ромын Пап Францисийн даалгасан ёсоор Вашингтонд айлчилж байна" гэж Цагаан ордны мэдэгдэлд дурджээ. Жан-Пьерийн хэлснээр, талууд Украин дахь байлдааны ажиллагааны улмаас шилжин нүүсэн хүмүүст хүмүүнлэгийн тусламж үзүүлэх, мөн Украины хүүхдүүдийг эх оронд нь буцаахтай холбоотой асуудлыг хэлэлцэнэ.

Ватиканы хэвлэлийн албанаас мэдээлснээр, АНУ-д хийх Ромын Папын элч төлөөлөгчийн айлчлал зургаадугаар сарын 19-ныг хүртэл үргэлжилнэ. Тэрбээр даваа гарагт Вашингтонд хүрэлцэн иржээ. 

“Вашингтонд хийх айлчлал нь Украинд энх тайван тогтоох төвлөгөөний хүрээнд явагдах бөгөөд өнөөгийн нөхцөл байдлын талаар санал солилцож, хамгийн эмзэг хүмүүст, ялангуяа хүүхдүүдэд туслах хүмүүнлэгийн санаачилгыг дэмжих зорилготой” гэж мэдэгдэл дурдсан байна.

Ромын Папын тусгай элч урьд нь Киев, Москвад айлчилсан юм. Москвад тэрбээр Москва ба бүх Оросын тэргүүн хамба  Кириллтэй, мөн Оросын Ерөнхийлөгчийн гадаад бодлогын асуудал эрхэлсэн туслах Юрий Ушаковтой уулзжээ. 

Эх сурвалж: "Монцамэ" агентлаг