Монгол Улсын Засгийн газар ба Pfizer Inc (Pfizer / Biontech) компанийн хооронд энэ оны тавдугаар сард байгуулсан гэрээний хүрээнд нийлүүлэх 2,5 сая Pfizer/Biontech вакцины ээлжит нийлүүлэлт болох 117,000 тун Пфайзер/БиоНТех BNT162  өчигдөр Монголд буулаа.

Дээрх гэрээний хүрээнд оруулж ирэх 2.5 сая тун вакциныг худалдаж авах хөрөнгийг 2021 оны гуравдугаар сарын 11-ний өдөр Монгол Улсын Гадаад харилцааны яаманд НҮБ-ын Хүүхдийн Сан болон Япон Улсын ЭСЯ хооронд гарын үсэг зурсан гэрээний дагуу Японы засгийн газрын буцалтгүй тусламжаар санхүүжүүлж байгаа юм. Бүр тодруулбал, 2.5 сая тун вакцины 2.35 сая тунгийн санхүүжилтийг Японы тал санхүүжүүлж байгаа юм.

Вакцин худалдан авах гэрээний дагуу хоёрдугаар улиралд нийт 255,060 тун вакцин хүлээн авсан бөгөөд гуравдугаар улиралд нийт 1,124,370 тун вакцин нийлүүлэгдэхээс өнөөдрийн байдлаар 567,450 тунг хүлээн авчээ. Үлдэгдэл тунг хуваарийн дагуу есдүгээр сарыг дуустал хүлээн авна.

Пфайзер вакциныг хичээлийн шинэ жил эхлэх болсонтой холбогдуулан эцэг эх, асран хамгаалагчийн зөвшөөрлийг үндэслэж 12-17 насны хүүхдүүдийг сайн дурын үндсэн дээр үргэлжлүүлэн вакцинжуулахад ашиглах юм.