Монгол Оросын хамтарсан III сургуулийн захирал Ж.Соронзон захирал багш нараасаа хичээлийн жилийн эхэнд хурааж авсан нэг сарын цалинг өнгөрсөн долоо хоногт эргүүлэн өгсөн талаар Нууц.мн цахим хуудаст мэдээлжээ. Мань захирал хурааж авсан мөнгөө сургуулийнхаа нийгмийн ажилтан Л.Тунгалаг гэгчийн хувийн дансанд хийж, хичээлийн жил дуустал банкинд хадгалуулан хүүг нь завшдаг байсан талаар ч бичсэн байна. Гэхдээ мөнгөний хэмжээ, цааш нь хэрхэн хүүлж ашиг олсон талаар энд бичихгүй. Гагцхүү гэмт этгээд үйлдлээ буцаасан ч гэмт үйлдэл нь хэвээр үлдэж хариуцлагаа хүлээх ёстой гэдэг зарчмын санааг л илэрхийлэхийг хүслээ.    

Монголдоо нэртэй хуульч эрхэм нэгэнтээ “Аливаа гэмт хэрэгтэнд хариуцлага хүлээлгэх үндэслэл бол үйлдэл л байдаг юм” гэж хэлж байж билээ. Хулгайлах, танхайрах, албан тушаалаа урвуулан ашиглах, бусдыг залилан мэхлэх бүгд гэмт хэрэг. Хохирлын хэмжээ бага байх хамаагүй. Их бол хүндрүүлэх нөхцөл болохоос бага байх нь гэмт хэргийг цайруулах шалтгаан болохгүй гэж. Манайд албан тушаалаа урвуулан ашиглаж улсаас хулгай хийдэг, зорилтот төсөлд өгөх ёстой хөнгөлөлттэй зээлийг өөрийн хамаарал бүхий ААН-д авч өгч бусдын боломжийг хулгайлдаг, дундаас нь хувь хүртдэг, тэр гэмт хэрэг нь илрэхээр авсан зээлээ эргүүлж төлчихөөд юу ч болоогүй юм шиг явдаг маш буруу жишиг тогтчихсон байна. Энэ байдлыг одоо халах цаг нь болсон.   

Ж.Соронзон захирлын дээрх хэрэг бол Хөдөлмөрийн хуулийг ноцтой зөрчсөн үйлдэл. Монгол Улсын Хөдөлмөрийн тухай хуулиар ажил олгогчийн зүгээс ямар нэгэн барьцаа хэрэглэхийг хатуу хориглосон байдаг. Тэр бүү хэл байгууллагад хохирол учруулсан ажилтнаас хүртэл суутгал хийхдээ нэг удаадаа цалин хөлсний 20 хувиас хэтрүүлж болдоггүй хуультай. Хүүхдийн тэтгэлэг гаргуулах, хэд хэдэн суутгал зэрэг хийж байсан ч 50 хувиас хэтрүүлж болдоггүй. Гэтэл Ж.Соронзон захирал “Ажлаас гарсан тохиолдолд буцааж олгохгүй” гэдэг ч юм уу, Монгол Улсад байхгүй, хуулиас давсан хууль зохиож ажилчдыг хохироож байсан нь Нууц,мн цахим хуудас гарсан нийтлэлд бичигдсэн “Тухайн сургуульд ажилладаг гадаад багш нарын 5-10 нь жил бүр ажлаасаа халагддаг бөгөөд  халагдсан багш нарын барьцаа хөрөнгө нь Л.Тунгалаг, Ж.Соронзон нарын орлого болдог хэмээн эх сурвалж хэллээ”, “...Хууль бусаар халагдаж хохирсон гадаад багш нарын мөнгийг буцаан өгөхгүй завшсан” гэсэн өгүүлбэрээс тодорхой харагдаж байгаа юм. .

Тиймээс өөрийн удирддаг сургууль дотроо Монгол Улсын хуулиас давсан хууль журам гаргасан Ж.Соронзон захиралд хариуцлага тооцох ёстой. Одоо хүчин төгөлдөр үйлчилж байгаа Эрүүгийн хуульд хохирлын хэмжээ нэг удаадаа хөдөлмөрийн хөлсний доод хэмжээнээс илүү гарсан тохиолдолд эрүү үүсгэдэг. Ж.Соронзонгийн хууль бус үйлдлээс болж багш нарт учирсан хохирлыг тооцвол багагүй дүн гарах нь тодорхой. Гэхдээ настай хүнийг Эрүү үүсгэж зовоож байснаас зүгээр л тэтгэвэрт нь гаргачихвал яасан юм бэ. Аль, аль талдаа асуудалгүй шүү дээ. Ж.Соронзон захирлын хувьд тэтгэвэрт гарах нас нь болчихсон юм билээ.