-ОХУ-ын эрчим хүчний сайд газрын тосны үнийг нэг хэсэгтээ л огцом хэлбэлзэнэ гэж таамаглажээ-

ОХУ-ын Эрчин хүчний сайд Николай Шульгинов “Известия” сонинд газрын тосны үнийг нэг хэсэгтээ л огцом хэлбэлзэлтэй байна гэсэн агуулгатай ярилцлага өгчээ. Тэрээр үнийг нарийн хэлэх ямар ч боломж байхгүй гээд, баррель нь ойролцоогоор 80-150 ам.долларын хооронд байна гэсэн таамаг хэлсэн байна. Эрчим хүчний яамны үүрэг нь газрын тосны үнийг таамаглах биш, салбарын хэвийн үйл ажиллагааг хангахад чиглэдэг гэдгийг мөн нухацтайгаар сануулсан байв. Хамгийн чухал нь, Москва нөхөрсөг харилцаатай улсууддаа ямар ч үнээр худалдахад бэлэн гэж тэрээр онцолжээ.  

Гадны хөрөнгө оруулагчид газрын тосны төслүүдэд нь оролцохоос татгалзаж байгааг тэрээр “Ирээдүйд хэрэгжих төслүүдэд л хамаатай” гээд, яамны зүгээс  одоо хэрэгжиж байгаа төслүүдийг хэвийн явуулах, ажлын байрыг хадгалах тал дээр анхаарч ажиллаж байгаа гэсэн байна.   

"Барууны орнууд ОХУ-ын эсрэг эдийн засгийн хориг ар, араас нь тавьж буйг үл харгалзан  рублийн ханш чангарч байгааг “Global Times” зэрэг хэвлэлд онцлон бичиж байна. Энэ нь ОХУ газрын тос, байгалийн хий зэрэг бараа, түүхий эдийн худалдаа зогсоогүйтэй холбоотой. Тэр тусмаа АНУ-ын Ерөнхийлөгч Жо Байден “Рублийн ханш шалдаа бууна” гэж таамагласан нь биелсэнгүй. Хэдий “Барууны” гэгддэг нэг хэсэг улс хориг тавьсан ч бусад ихэнх улсууд Москвад хориг тавихаас татгалзаж байгаа нь тэдгээр улсуудын ашиг сонирхолтой зөрчилдөж байгаатай холбоотой хэмээн хэвлэлүүдэд бичиж байна" хэмээн энэ талаар мэдээлсэн news.ru цахим хуудас мэдээллээ төгсгөжээ.