Мангуст гэж амьтан бий. Монголчууд бид “могойч хулгана” гэж нэрлэдэг энэ амьтны уугуул нутаг нь Энэтхэг боловч эдүгээ халуун бүсийн олон оронд нутагшин амьдрах болжээ. Нүд гүйцэмгүй түргэн хөдөлгөөнтэй могойч хулганын дуртай зоог нь хортой могой юм. Хорт могойн мэдрэлд нөлөөлөх болон цус бүлэгнүүлэлтийн эсрэг хор могойч хулганад үйлчилдэггүй аж. Тиймээс могой түүнийг хатгасан ч огтхон ч хордохгүйгээр барьж иддэг.    

Мангуст нь бие жижиг ч шалмаг хөдөлгөөнтэй, хаан нажийг ч ялан дийлж зоогоо болгодог амьтан. Буддын бэлгэдэлзүйд хаан нажийг эрдэнэсийн хамгаалагч гэж үздэг тул түүнийг ч дийлдэг мангуст тэнд ямархан байр сууринд залрах нь ойлгомжтой биз ээ. Жамбал, Очирваань бурхныг ихэвчлэн зүүн мутартаа мангуст барьсан, тэр нь эрдэнээр бөөлжиж байгаагаар зурсан байдаг. Энэ нь Төв Азийн ард түмэн эртнээс эрдэнэсийн хамгаалагч могойг дийлэгч мангустын арьсаар мөнгөний уутаа оёж, зоос, эрдэнэс, үнэт чулуугаа амаар нь хийж, авдаг байсантай холбоотой юм. Харин манайд мангуст байхгүй тул мангустыг харсан монголчууд хамгийн ойр амьтнаар нь төлөөлүүлэн сэтгэж, хулгана болгожээ.