Нүүрсний хэргийг шинжлэн судлах сонсгол дөрөв дэх өдрөө үргэлжилж байна. Шинжээчийн дүгнэлттэй холбогдуулан гишүүд гэрчүүдээс тодруулга мэдээлэл авч байна. Энэ үеэр Түр хорооны гишүүд өөрсдийн байр суурийг илэрхийлж үг хэлэв.

УИХ-ын гишүүн О.Цогтгэрэл:

-Хараад байхад гишүүдийн асуултад хангалттай хариулт өгөхгүй байна. Тодорхой мэдээллийг удирдлагууд нь л өгнө шүү дээ. Тиймээс "Эрдэнэс Тавантолгой" ХК-ийн гүйцэтгэх захирал асан Б.Ганхуягийг сонсголд оролцуулах хэрэгтэй. Зорчих эрхийг нь хязгаарласан бол ядаж цахимаар оролцуулъя. Энд сууж байгаа мэргэжилтнүүд нь юм мэдэхгүй байна гэсэн юм.

Харин Түр хорооны дарга Б.Энхбаяр "Б.Ганхуягийн ар гэрийн төлөөллийг УИХ-ын гишүүн Ш.Адьшаа Төрийн ордонд оруулж, хэвлэл мэдээллийн зохион байгуулалттай акцыг өчигдөр хийсэн. Энэхүү сонсгол ашиггүй, зогсоох гэсэн сонирхлоо таслан зогсоох хэрэгтэй. Иймэрхүү ажлыг нүүрсчид идэвхтэй зохион байгуулж байгаа. УИХ-ын гишүүн Ш.Адьшаа хоёр дахь сонсгол дээр дуудагдана. Энэ асуудлыг нүүрсний хоёр дахь сонсголд гарч ирэх том нүүрсчид хамтран зохион байгуулсан. Үүнийгээ зогсоо. Нүүрсний сонсголыг таслан зогсоох гэсэн аливаа санаархал оролдлогод автахгүй, зогсохгүй гэсэн юм.