Төсвийн байнгын хорооны өчигдрийн хуралдаанаар тус байнгын хорооны дарга Г.Тэмүүлэнг үргэлжлүүлэн ажиллуулахаар болсон. Засгийн газрын тусгай сангийн тухай хуульд өөрчлөлт оруулах тухай хуулийн төслийн анхны хэлэлцүүлгийг хийв. Хуралдаан Засгийн газраас 2023 оны аравдугаар сарын 24-ний өдөр өргөн мэдүүлсэн Засгийн газрын тусгай сангийн тухай хуульд өөрчлөлт оруулах тухай хуулийн төслийн анхны хэлэлцүүлгээр үргэлжилсэн.

Хэлэлцэж буй асуудалтай холбогдуулан УИХ-ын гишүүн Ц.Даваасүрэн: -Тусгай сангууд шиг дунд шатандаа ажил унагаадaг явдал гарахаас болгоомжилж байна. Тус сангийн үйл ажиллагааг нь иргэдэд ил тод байлгахад салбарын яам анхаарч байгаа юу. Гадаадад зайлшгүй шаардлагаар эмчлүүлсэн хүүхдийн эмчилгээний зардлын 50 хувь, насанд хүрэгчдийн зардлын 20 хувийг буцаан олгоно гэж байгаа нь сайдын байр суурь уу, эсвэл ийм шийдвэр гарсан уу.

Эрүүл мэндийг сайд С.Чинзориг: -Бусад тусгай сангууд шиг мэдээлэлд ойр албан тушаалтай хэсэгт үйлчилдэг сан болчих вий гэсэн гишүүдийн болгоомжлолтой санал нэг байна. Иймд иргэдийн оролцоо, хяналтыг хангаж ажиллахаар холбогдох журмын төслийг боловсруулна. Өнөөдөр гадаадад зайлшгүй шаардлагаар эмчилгээнд хамрагдаад ирсэн иргэдийн зардлын таван хувийг буцаан олгож байгаа нь маш бага тул үүнийг үе шаттай нэмэгдүүлье гэж байгаа юм. Нэг хүүхдийн эмчилгээний зардлын 50 хувь, насанд хүрсэн хүний эмчилгээний зардлын 20 хувийг буцааж олгохоор Эрүүл мэндийн яамнаас холбогдох тооцоо судалгаа хийсэн. Миний байр суурь ч ийм байгаа. Энэ талаарх саналаа Засгийн газарт оруулна. Уг саналыг дэмжих эсэхийг Засгийн газар шийднэ, учир нь холбогдох журмыг Засгийн газрын тогтоолоор батлах юм.

Эх сурвалж: "Өдрийн сонин"