Авлигатай тэмцэх газарт шалгагдаж буй хэргүүдийн явцын талаар АТГ-аас тайлбар, мэдээлэл өглөө. Энэ үеэр АТГ-аас Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны дарга асан Ж.Сүхбаатарт Эрүүгийн хэрэг үүсгэн, яллагдагчаар татах саналыг Нийслэлийн прокурорын газарт хүргүүлсэн гэдгийг мэдээллээ.

АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэн хэлэхдээ “Ногоон автобусны гэх хэрэг дээр тасралтгүй мөрдөн шалгах ажил явж байна. Уг хэрэгтэй холбоотойгоор Монгол Улсын сайд асан Ж.Сүхбаатарт Эрүүгийн хэрэг үүсгэж, яллагдагчаар татах саналтайгаар Нийслэлийн прокурорын газарт хүргүүлсэн. Одоогоор прокурорын яллагдагчаар татсан тогтоол гараагүй байна. Албан тушаалын байдлаа урвуулан ашиглаж бусдад давуу байдал бий болгосон байж болзошгүй гэсэн үндэслэлээр яллагдагчаар татах саналыг хүргүүлсэн. Харин Нийслэлийн Засаг дарга асан Д.Сумъяабазарыг яллагдагчаар татах саналыг хүргүүлээгүй. Гэхдээ мөрдөн шалгах ажиллагаа явж байгаа.

Автобусны хэрэгтэй холбоотойгоор нийтдээ 26 хүнийг яллагдагчаар татсан байгаа. Үүнд нийтийн албан тушаалтан 18, гадаад улсын иргэн дөрөв, хуулийн этгээдийн албан тушаалтан дөрөв байна” гэлээ.