УИХ-ын чуулганы өнөөдрийн хуралдаанаар Гэр бүлийн тухай хуулийн шинэчилсэн найруулгын хуулийн төслийг хэлэлцэж байна. 

Энэ хуулийн төсөл Ахмадын хуультай хэр нийцэж байгааг УИХ-ын гишүүн Б.Жаргалмаа тодруулав. Тэрбээр "Асрамжийн газарт байгаа хөгшчүүлтэй хамааруулж асууж байгаа юм. Аав, ээжийгээ асарч хамгаалдаггүй хүүхдүүдийн асуудал бусад хуультайгаа хэр нийцэх вэ. Нэгэн цагт гэр бүл л байсан шүү дээ. Эцэг, эхээ төрд хаячихдаг, асардаггүй энэ зүйлийг бусад хуультайгаа хэр дүйцүүлэх вэ гэдгийг тодруулмаар байна" гэв.

Түүний асуултад Хөдөлмөр, нийгмийн хамгааллын сайд Х.Булгантуяа "Ахмад настны тухай хууль гэх мэтчилэн бусад хуульд энэ талаар зааж өгөхгүй бол ахмад настны эрх зөрчигдөх тохиолдол их байна. Үр хүүхэд нь эцэг эхээ хүчирхийлдэг, үл хайхардаг, тэтгэврийнх мөнгийг нь аваад бараг гудамжинд гаргадаг үйлдэл байгаа учраас үүнийг Ахмад настны тухай хуульд зааж өгөх нь зүйтэй гэж таны саналыг хүлээн авч байна" хэмээв.