МИАТ” ТӨХК-ийн маркетингийн хэлтсийн дарга А.Энхтуяа, Борлуулалтын мэргэжилтэн Г.Янжинлхам, Хуулийн хэлтсийн дарга Н.Гантулга  нар Завхан аймгийн удирдлагууд, агентлагийн дарга нар, хувийн хэвшлийн байгууллагын төлөөлөлтэй уулзаж танилцуулга, мэдээлэл хийв.

Тус компани нь 15 жилийн дараа орон нутгийн 8 чиглэлд нислэг үйлдэж эхэлсэн. Завхан аймагт долоо хоног бүрийн даваа, пүрэв гарагт шууд нислэг үйлдэж байгаа юм. Нислэгийн тийзний НӨАТ орсон үнэ нэг талдаа 354,000-419,000 төгрөг, хоёр талдаа 703,000-834,000 төгрөг байна. Цагийн хуваарийн хувьд орон нутгийн цагаар Улаанбаатараас -Улиастай 11:30-12:55, Улиастайгаас-Улаанбаатар 13:35-14:45 бууна.

Тийзийг www.miat.com вэб сайт болон 11-333-999 дугаараар захиалах боломжтой.

Зорчигчдод Хөшигтийн хөндийн нисэх буудлаас Улаанбаатар хотын төв рүү орох хуваарьт чиглэлийн автобус цаг тутамд үйлчилж байгаа ба үнэ тарифын хувьд одоогоор 20,000 төгрөг байгаа юм.

Цаашдаа энэ үнийг буулгах талаар ажиллаж байгаа, хот хөдөөг холбох бодлогын хүрээнд МИАТ ТӨХК-аас ЗГХЭГ-тай орон нутгийн нислэгийн үнэ тарифыг бууруулах талаар зөвшилцөж байгаа, 2024 оны 3 дугаар сараас эхлэн 70 хүний суудалтай, ачаа тээврийн даац өндөртэй, хүнд өвчтөнийг хэвтүүлэн авч явах стандарт бүхий онгоцоор нислэг үйлдэж эхэлнэ гэсэн мэдээллүүдийг өглөө. Орон нутагт МИАТ ТӨХК-аас 5 жилийн хугацаанд тасралтгүй нислэг үйлдэхээр төлөвлөж байгаа юм байна.