АНУ-ын ерөнхийлөгч Жо Байден өчигдөр Хамас-Израилийн мөргөлдөөний асуудлаар Өрнөдийн холбоотнуудын удирдагчидтай болон Ромын Паптай утсаар ярилцжээ.

Тэрбээр Израилийн ерөнхий сайд Бенжамин Нетаньяхутай ярьсныхаа дараа Канад, Франц, Их Британи, Герман, Италийн төр засгийн тэргүүнүүдтэй болон Ромын католик шашны тэргүүнтэй тус тусад нь ярилцсан байна.

Байден, Нетаньяху нар Ням гарагт ярилцахдаа Египетийн хилээр Газын зурваст тусламжийн ачааны хоёр дахь хэсгийг нэвтрүүлэхээр тохиролцжээ.

Харин Өрнөдийн удирдагчидтай яг ямар асуудлаар ярилцсаныг Цагаан ордон мэдээлээгүй байна.

Ямартай ч тэр Японоос гадна Их Долоогийн бүлгийн бусад бүх удирдагчидтай Ойрх Дорнодын хямралын асуудлаар ярилцжээ.

Ромын Паптай 20 минутын турш ярилцахдаа “Ойрх Дорнодод мөргөлдөөн өргөжин тэлэхээс сэргийлэх, урт хугацаанд үргэлжлэх энх тайвныг тогтоох арга замуудын талаар ярилцсан” гэж Цагаан ордон мэдээлсэн байна.

Хамас-Израилийн дайныг Ираны дэглэм өөрийн гар хөлөөр дамжуулан өргөжүүлэх эрсдэлтэй болсныг АНУ-ын төрийн нарийн бичгийн дарга Энтони Блинкен, Пентагоны тэргүүн Ллойд Остин нар Ням гарагт анхааруулжээ.

Хэрвээ бүс нутаг дахь Америкийн цэрэг, зэвсэгт хүчин рүү ийм дайсагнасан ажиллагаа чиглэвэл Байдены засаг захиргаа зохих хариу арга хэмжээг авахад бэлэн байгааг тэд мэдэгдсэн байна.

Нөхцөл байдал хүндэрсэнтэй холбоотойгоор Иракийн нийслэл Багдад хот дахь АНУ-ын элчин сайдын яам, Эрбил хот дахь консулын газрын нэн чухал биш үүрэгтэй дипломат ажилтнууд, тэдгээрийн гэр бүлийг нүүлгэн шилжүүлэх шийдвэрийг төрийн департамент өчигдөр гаргажээ.

Францын ерөнхийлөгч Эммануэл Макрон маргааш буюу Мягмар гарагт Израильд айлчлахаар болсныг Элизейн ордон Ням гарагт зарласан байна.

Нидерландын ерөнхий сайд Марк Рутте өнөөдөр буюу Даваа гарагт мөн Израильд айлчилж, ерөнхий сайд Бенжамин Нетаньяху болон Палестины ерөнхийлөгч Махмуд Аббас нартай тус тусдаа уулзахаар болсныг өчигдөр бас зарлажээ.

Эх сурвалж: AFP